Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 274 Hüküm no: 223 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’dan intikal eden terekeden torunu Emine’ye nafaka tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Otakçıbaşı Mahallesiʼnde sâkine iken bundan akdem vefât eden Hadice bt. Abdullah nâm hatunun oğlu kızı Emine bt. el-merhûm Ali nâm sagīrenin vâlidesi ve [vasiyyesi] işbu râfiʻatü’l-kitâb Âişe Hatun bt. Mehmed meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasiyyesi olduğum sagīre-i mezbûrenin nafaka ve kisveye eşedd-i ihtiyâcı olmağla ceddesi müteveffât-ı mezbûreden müntakil mâl-ı mevrûsundan kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyye-i mezbûrenin kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri müteveffât-ı mezbûreden müntakil mâlından sagīre-i mezbûreye beher yevm ikişer para nafaka ve kisve-bahâ farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisvesine harc u sarfa ve lede’l-iktizâ istidâneye ve inde’z-zafer mâlından rücû‘a vasiyye-i mezbûre[ye] izin vermeğin mâ-vaka‘a bi’t-taleb ketb olundu. Fi’l-yevmi’s-sânî aşer min-Saferi’l-hayr li-sene tisʻa ve hamsîn ve mi’e ve elf. Şuhûdü’l-hâl: İmâm Mahmud Efendi b. İbrahim, Mehmed Beşe [b.] Ahmed, Halil Çelebi b. İbrahim, Hüseyin Çelebi b. Mehmed, es-Seyyid Mehmed [b.] es-Seyyid Mustafa.