Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 276 Hüküm no: 225 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Subatmaz adlı bostanda kiracı olan Sarı Yani’nin, kira müddeti sona eren ortağı Aleksi’ye hissesi bedelini malından vermesi Sâdır olan fermân-ı âlîşânlarına imtisâlen savb-ı şer‘den irsâl olunan Mevlânâ Mehmed Said Efendi b. İbrahim Havâss-ı Refîʻa’ya tâbi‘ Demirkapı Çiftliği’ne varıp mezkûra tâbi‘ kurbünde Subasmaz tâʻbir olunan sebze bostanına varıp huzûr-ı Müslimîn’de ba‘de akdi’l-meclis çiftlik-i mezkûru der-uhde eden mefharü’l-emâsil ve’l-akrân bâʻisü’d-defter es-Seyyid Mustafa Efendi b. el-merhûm el-Hâc Musa meclis-i ma‘kūd-ı mezkûrda bostan-ı merkūmda müstecir olan Sarı Yani nâm zimmî muvâcehesinde takrîr-i kelâm edip mezbûr Yani ile şerîki gāib ani’l-meclis Aleksi zimmî bostan-ı merkūmda dört sehm i‘tibârıyla birer sehmi bi’l-iştirâk taht-ı icârelerinde olup mezbûrânın müşterek mezrû‘ât-ı sebzevâtı ve mevcûd âlât-ı lâzıme ve hayvan ve eşyâ ve hayvan mezbûr Yani’den suâl ve takrîri tahrîr ve bostancılar kethüdâsı Ahmed Ağa ve sâir ustalar ma‘rifet ve haberleriyle kıymetleri takvîm ve herbirinin tasarruflarında olan birer sehm hisselerine isâbet eden kıymet-i misilleri ma‘lûm oldukda mezbûr Aleksi’nin müddet-i icâresi tekmîl ve tecdîd-i îcâr ve istîcâr bulunmamağla hîn-i ihrâcda kıymet-i lâzımelerin mâlımdan edâ murâdımdır dedikde mezbûr Yani’nin haber ve takrîriyle kethüdâ ve ustalar ma‘rifetleriyle kıymetleri takvîm ve keşfolunan sebzevât ve mezrû‘ât ve hayvan ve âlât-ı müştereke defteridir ki ber-vech-i âtî zikr olunur. Fi’l-yevmi’r-râbiʻ ve’l-ışrîn min-Saferi’l-hayr li-sene tisʻa ve hamsîn ve mi’e ve elf. Sarımsak-ı mezrû‘, 30.000 aded fî: 600 18.000 meblağ Soğan-ı mezrû‘, 31 keyl fî: 600 18.600 meblağ Lahana-i mezrû‘, 4 kıyye fî: 1.200 4.800 meblağ Bakla, 20 kîle fî: 360 7.200 meblağ İsfenah-ı mezrû‘, 1 kîle 3.000 meblağ Pırasa-yı mezrû‘, 3 kıyye fî: 600 1.800 meblağ Badılcan-ı mezrû‘, 4 kıyye fî: 480 1.920 meblağ Buğday-ı mezrû‘ 30 kîle, fî: 240 7.200 meblağ Şa‘îr-i mezrû‘, 10 kîle fî: 120 1.200 meblağ Alef, 30 kıyye fî: 120 3.600 meblağ Balkabağı tohumu, 4 kîle fî: 300 1.200 meblağ İsfenah tohumu, 15 kîle fî: 100 1.500 meblağ Öküz, 2 çift 9.600 meblağ Gübre 4.800 meblağ Binâ olunan oda masrafı 18.000 meblağ Âlât-ı çift ve evânî-i nuhâs ve âlât-ı lâzıme 12.000 meblağ Bârgir, 2 çift 4.800 meblağ Araba, 2 aded 600 meblağ Tavuk, 50 aded fî: 20 1.000 meblağ Kovan, 5 aded fî: 120 600 meblağ Tohum-ı lahana, 10 kıyye 4.800 meblağ Tohum-ı şalgam ma‘a pırasa 360 meblağ Cem‘an yekûn: 126.480. Yalnız yüz yirmi altı bin [dört yüz] seksen akçe olup beher rub‘ otuz bir bin altı yüz yirmi akçe isâbet eder. Hisse-i Sarı Yani 31.620 akçe Hisse-i Aleksi 31.620 akçe Hisse-i Karayani 31.620 akçe Hisse-i Karayorgi 31.620 akçe Vech-i meşrûh üzere bostan-ı mezkûrda dört sehm i‘tibârıyla isimleri mezkûr zimmîler birer sehmde müstecirler olup merkūm Aleksi müddet-i icâresini tekmîl ve sene-i cedîdde îcâr ve istîcâr olunmamağla icâre-i mütemmimeden zimmetinde bâkī yirmi dokuz guruş mahsûb ve bâkī meblağ-ı [57a] mezbûr yirmi sekiz bin yüz kırk akçe kaldığı bu mahalle şerh verildi.