Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 277 Hüküm no: 226 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Petro’nun, ölen Ferişti v. Petro’nun kardeşi ve vârisi olduğunu ispatlaması Havâss-ı Refîʻa kazâsına tâbi‘ suyolu karyelerinden Belgrad nâm karyede mütemekkin iken bundan akdem hâlik olan Ferişti? v. Petro nâm zimmînin ber-vech-i âtî li-ebeveyn karındaşı mukarrun-leh bi’n-neseb cihetinden hasren vârisi olduğunu iddiʻâ eden işbu râfiʻü’s-sifr Nikola v. Petro nâm zimmî meclis-i şer‘-i şerîf-i enverde karye-i mezbûrenin beytülmâlını kabza meʼmûr olup tereke-i hâlik-i mezbûra bi’l-emâne vaz‘-ı yed eden fahrü’l-akrân Hüseyin Ağa b. el-Hâc Hasan nâm kimesne mahzarında üzerine da‘vâ ve takrîr-i kelâm edip hâlik-i mezbûr Ferişti nâm zimmî ile ben li-ebeveyn karındaşlar olup babamız ismi Petro ve dedemiz ismi Yorgo ve anamız ismi Ezileto bt. Yorgo ve maskat-ı re’simiz vilâyet-i Rumeli’nde Rakova kasabasından olup hatta hâlik-i mezbûr hayâtında vech-i muharrer üzere li-ebeveyn karındaşı ve hasren vârisi ve terekesine benden gayrı müstahikk-ı âhar dahi olmadığını şuhûd muvâcehesinde kirâren ve mirâren ikrâr ve işhâd edip hâlik-i mezbûrun terekesinden emîn-i merkūm Hüseyin Ağa zimmetinde on iki guruş ile on dört re’s koyun ve on re’s kuzuya bi’l-emâne vaz‘-ı yed etmekle suâl olunup kasr-ı yedine tenbîh olunmak bi’l-verâse matlûbumdur dedikde gıbbe’s-suâl emîn-i merkūm cevâbında vech-i muharrer üzere bi’l-emâne vaz‘-ı yedini ikrâr lâkin müdde‘î-i mezbûrun ber-vech-i muharrer vâris olduğunu inkâr edicek, müdde‘î-i mezbûreden müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den medîne-i Eyüb’de Çavuş Kasım Mahallesiʼnde sâkin İsa Ağa b. Mehmed nâm kimesne ile udûl-ı ahrâr-ı Nasârâ’dan olup medîne-i mezbûrda mütemekkin Dimo v. Yuvan nâm zimmî li-ecli’ş-şehâde meclis-i şer‘a hâzırân olup isre’l-istişhâd fi’l-hakīka hâlik-i mezbûr Ferişti nâm zimmî ile işbu müdde‘î-i mezbûr Nikola nâm zimmî li-ebeveyn karındaşlar olup babaları ismi Petro ve dedeleri ismi Yorgo ve anaları ismi Ezileto bt. Yorgo ve maskat-ı re’sleri vilâyet-i Rumeli’nde Rakova kasabasından olup hatta hâlik-i mezbûr hayâtında vech-i muharrer üzere müdde‘î-i mezbûr li-ebeveyn karındaşı olduğunu bizim huzûrumuzda kirâren ve mirâren ikrâr ve bizi işhâd edip hâlik-i mezbûra müdde‘î-i mezbûr Nikola dahi hasren vârisi olup terekesine bundan gayrı müstahikk-ı âhar olduğu ma‘lûmumuz değildir, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûrun verâsetine baʻde’l-hükm ve’t-tenbîh mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Saferi’l-hayr li-sene tisʻa ve hamsîn ve mi’e ve elf. Şuhûdü’l-hâl: Ahmed Efendi b. Mustafa, Ahmed Efendi b. Mehmed Hamdi, Halil Efendi b. Ahmed Efendi, es-Seyyid Mehmed b. es-Seyyid Mustafa, İsmail b. ( ).