Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 278 Hüküm no: 227 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadika-i Hassa bostancılarından Bahçıvan Arnavud Hasan’ın vârisi olmadığından beytülmâla kalan terekesi Fi’l-asl vilâyet-i Rumeli’nde Tepedelen kazâsına tâbi‘ Çubuk karyesinde hâlâ sâkin olup bundan akdem vefât eden Hadîka-i Hâssa bostanîlerinden Bağçevân Arnavud Hasan b. Hüseyin’in zâhirde vâris-i ma‘rûfu olmayıp terekesi beytülmâla âid olmağla tâife-i mezbûrûnun bâ-hatt-ı hümâyûn-ı şevket-makrûn beytülmâlını kabza meʼmûr olan iftihârü’l-havâs ve’l-mukarrabîn muʻtemedü’l-mülûk ve’s-selâtîn hâlâ bi’l-fi‘il bostancıbaşı sa‘âdetlü Hüseyin Ağa b. Mustafa taraf-ı bâhirü’ş-şereflerinden vekîl-i sâbitü’l-vekâlesi Çukadâr el-Hâc Yusuf Ağa b. Abdullah ile vâlidesi Saray ustası es-Seyyid Ali Ağa b. Mustafa taleb ve ma‘rifetleriyle tahrîr olunan müteveffâ-i mezbûrun Topkapısı hâricinde Bayrampaşa’da İmâm Bostanı demekle ma‘rûf bostan derûnunda mezrû‘ sebzevât ve sâir âlâtından nısf hisse müteveffâ-i mezbûrun olmağla bostan-ı mezbûrun derûnunda olan nısf hissesi Bağçevânlar Kethüdâsı Ahmed ve yiğidbaşıları ve sâir ustalar beyʻ-i men yezîd olunan nısf hisse semenidir ki ber-vech-i âtî zikr olunur. Fi’l-yevmi’s-sânî ve’l-ışrîn min-Saferi’l-hayr li-sene tisʻa ve hamsîn ve mi’e ve elf. Müteveffâ-yı mezbûrun bağçe-i mezbûrda vâki‘ sebzevât ve sâir âlâtdan nısf hisse semeninden vekîl-i mezbûrun makbûzu: 19.050. Yalnız on dokuz bin elli akçedir. Minhâ el-ihrâcât: Resm-i bostancıbaşı ağa hazretleri 1.900 akçe Resm-i âdî 490 akçe Kalemiye-i kâtib 240 akçe Çukadâriye 180 akçe İhzâriye 90 akçe Bostancıbaşı ağa hazretlerinin çukadârına verilen 480 akçe Bağçevânlar kethüdâsına ve yiğidbaşı ve sâir ustalara ve dellâliyesine vekîl-i mezbûrun verdiği 1.220 akçe Kaydiye-i defter 30 akçe Cem‘an yekûnü’l-mesârif: 4.610 akçe. Yalnız dört bin altı yüz on akçedir. Sahhe’l-bâkī bi-yedi emîni’l-mezbûr, meblağ: 14.440 [akçe]. Yalnız on dört bin dört yüz kırk akçedir.