Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 279 Hüküm no: 228 Orijinal metin no: [57a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşçı Ali Beşe ile oğlu Kurşuncu Osman Çelebi’nin vefâtları sonrasında hanımları Emetullah Hatun ile Fâtıma Hatun arasındaki miras anlaşmazlığı Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi medîne-i Hazret-i Ebî Eyyüb el-Ensârî -radiye anhu rabbihi’l-bârî-’de Fethi Çelebi Mahallesiʼnde sâkin iken bundan akdem vefât eden Taşçı Ali Beşe b. Mehmed’in hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun verâseti [57b] zevce-i menkûha-i metrûkesi Emetullah Hatun bt. Abdullah ile sulbî kebîr oğlu Kurşuncu Osman Çelebi’ye münhasıra olup ba‘dehû mezbûr Osman Çelebi dahi vefât edip verâseti zevce-i menkûha-i metrûkesi Fâtıma Hatun bt. Mehmed ile vâlidesi mezbûre Emetullah Hatun ve sulbî sagīr oğulları Numan ve Mustafa’ya münhasıra olduğu şer‘an zâhir ve müteʻayyen oldukdan sonra zâtı ta‘rîf-i şer‘î ile mu‘arrefe olan işbu râfiʻatü’l-kitâb mezbûre Emetullah Hatun meclis-i ma‘kūd-ı mezkûrda sagīrân-ı mezbûrânın vâlideleri ve tesviye-i emirlerine kıbel-i şer‘den mansûbe vasiyyeleri olup zikri âtî menzile bi’l-verâse ve bi’l-vesâye vâzıʻatü’l-yed olan zâtı kezâlik ta‘rîf-i şer‘î ile mu‘arrefe mezbûre Fâtıma Hatun mahzarında üzerine da‘vâ ve takrîr-i kelâm edip zevcim müteveffâ-i evvel-i mezbûrun yedinde olup mahalle-i mezbûrede vâki‘ bir tarafdan Fâtıma Hatun menzili ve bir tarafdan Âişe Hatun menzili ve bir tarafdan diğer Fâtıma Hatun menzili ve bir tarafdan tarîk-i âm ile mahdûd iki bâb fevkānî oda ve bir matbah ve kenîf ve havluyu muhtevî mülk menzilden nısfını tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcim müteveffâ-i evvel-i mezbûr Ali Beşe b. Mehmed b. Abdullah târîh-i kitâbdan yirmi sene mukaddem huzûr-ı Müslimîn’de elli guruşa bana beyʻ ve temlîk ve teslîm, ben dahi ber-vech-i muharrer iştirâ ve temellük ve tesellüm ve kabz ve kabûl eylediğimden sonra semeni olan meblağ-ı mezbûr elli guruşu yedimden bi’t-tamam ahz u kabz edip ol vechile benim mülk-i müşterâm olmuş iken mezbûre Fâtıma Hatun nısf menzil-i mezkûra bi’l-verâse ve bi’l-vesâye bi-gayr-ı hakkın vaz‘-ı yed eder, suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûre Fâtıma Hatun cevâbında bi’l-verâse ve bi’l-vesâye vech-i muharrer üzere vaz‘-ı yedini ikrâr lâkin müdde‘iye-i mezbûrenin ber-vech-i muharrer müddeʻâsını inkâr edicek, müdde‘iye-i mezbûreden müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den medîne-i mezbûrede Nişancı Paşa Mahallesiʼnde sâkin Abdullah Odabaşı b. Abdülkerim ve mahalle-i mezbûrede sâkin diğer Abdullah Odabaşı b. el-Hâc Mehmed nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müdde‘iye-i mezbûre Emetullah Hatun’un zevci müteveffâ-i evvel-i mezbûrun yedinde mülkü olup mahalle-i mezbûrede vâki‘ bir tarafdan Fâtıma Hatun menzili ve bir tarafdan Âişe Hatun menzili ve bir tarafdan diğer Fâtıma Hatun menzili ve bir tarafdan tarîk-i âm ile mahdûd iki bâb fevkānî oda ve bir matbah ve kenîf ve havluyu muhtevî mülk menzilden nısfını tarafeynden îcâb ve kabûlü hâvî bey‘-i bâtt-ı sahîh-i şer‘î ile müteveffâ-i evvel-i mezbûr Ali Beşe b. Mehmed b. Abdullah târîh-i kitâbdan yirmi sene mukaddem bizim huzûrumuzda zevcesi işbu müdde‘iye-i mezbûre Emetullah Hatun’a elli guruşa beyʻ ve temlîk ve teslîm, ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr elli guruşu yedinden bi’t-tamam ahz u kabz edip ol vechile müdde‘iye-i mezbûre Emetullah Hatun’un mülk-i müşterâsı ve hakk-ı sırfı olmuşdur, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr ba‘de[hû] ma‘an ba‘s olunan Çukadâr Ahmed Ağa b. Hamdi Mehmed ve Muhzır es-Seyyid Mehmed b. Mustafa ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Saferi’l-hayr sene tisʻa ve hamsîn ve mi’e ve elf. Şuhûdü’l-hâl: Ali Beşe b. Ahmed, Ahmed Ağa b. Abdullah, Mehmed Beşe b. Mustafa, Mustafa Beşe b. Ahmed, Müezzin Mollâ Hüseyin b. Mahmud, Bostanî Ahmed b. Mehmed, Bostanî Mehmed b. Abdullah.