Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 281 Hüküm no: 229 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un terekesinden küçük kızı Nefise’ye nafaka tahsis edilmesi Havâss-ı Refîʻa kazâsına tâbi‘ Petnehor karyesinde sâkine iken bundan akdem vefât eden Rukiye Hatun bt. Osman Efendi’nin sadriye sagīre kızı Nefise’nin tesviye-i umûruna kıbel-i şer‘den mansûb vasîsi olan babası işbu râfiʻü’l-kitâb Mahmud Efendi b. Hüseyin meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasîsi olduğum sagīre-i mezbûrenin nafaka ve kisveye eşedd-i ihtiyâcı olmağla vâlidesi müteveffât-ı mezbûreden müntakil mâlından kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûreye vâlidesi müteveffât-ı mezbûreden müntakil mâlından beher yevm ikişer para nafaka ve kisve-bahâ farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisve[sine] harc u sarfa ve lede’l-iktizâ istidâneye ve inde’z-zafer mâlından rücû‘a vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Saferi’l-hayr sene tisʻa ve hamsîn ve mi’e ve elf. [58a] Şuhûdü’l-hâl: Mahmud Efendi b. Mehmed, Mustafa Efendi b. Kasım, Mollâ Ali b. Abdurrahman, Ahmed Efendi b. Mustafa, Halil Çelebi b. İbrahim.