Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 281 Hüküm no: 230 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un küçük kızı Nefise’ye babası Mahmud Efendi’nin vasi, dedesi Osman Efendi’nin nazır tayin edilmesi Havâss-ı Refîʻa kazâsına tâbi‘ Petnehor karyesinde sâkine iken bundan akdem vefât eden Rukiye Hatun bt. Osman Efendi’nin sadriye sagīre kızı Nefise’nin tesviye-i umûruna kıbel-i şer‘den bir vasî nasbı lâzım ve mühim olmağın sagīre-i mezbûrenin babası olup mahmûdü’l-hâl idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfiʻü’l-kitâb Mahmud Efendi b. Hüseyin’i hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin tesviye-i umûruna vasî nasb u ta‘yîn ve üzerine işbu hâzır bi’l-meclis ceddesi mezbûr Osman Efendi b. Feyzullah’ı nâzır nasb u ta‘yîn buyurduklarında ânlar dahi herbiri ber-vech-i muharrer vesâyet ve nezâret-i mezbûreyi kabûl ve hizmet-i lâzımelerin kabûl taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Saferi’l-hayr li-sene tisʻa ve hamsîn ve mi’e ve elf. Şuhûdü’l-hâl: Eş-Şâhidûnü’s-sâbıkūn.