Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 289 Hüküm no: 236 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un, hastalığında baktığı Fâtıma’nın terekesinden vasiyeti de olan hizmet bedelini almak istemesi Mahmiye-i İstanbul’da Sultan Hamamı kurbünde sâkine sâhibetü’l-kitâb Zeyneb bt. Mehmed nâm hatun tarafından zikr-i âtî husûsda vekîl olduğu zât-ı mezbûreyi ma‘rifet-i şer‘iyye ile ârifân olan mahalle-i mezbûre sâkinlerinden Osman Çelebi b. Hasan ve Hasan Çelebi b. Murad nâm kimesneler şehâdetleriyle vekâleti sâbit olan Müezzin Süleyman Çelebi b. Osman Çelebi [59b] meclis-i şer‘-i enverde medîne-i Hazret-i Ebî Eyyüb Ensârî’de Servi Mahallesiʼnde sâkine iken bundan akdem vefât eden Fâtıma bt. Mustafa nâm hatunun bâ-hüccet-i şer‘iyye vasiyy-i muhtârı olan Mehmed Çelebi b. Mustafa muvâcehesinde bi’l-vekâle üzerine da‘vâ ve takrîr-i kelâm edip müvekkilem mezbûre Zeyneb müteveffât-ı mezbûre Fâtıma Hatun’a iki sene mukaddem zikr olunan Sultan Hamamı kurbünde sâkine hasta olmağla bir seneden mütecâviz hizmet etmekle hizmeti mukābelesinde ol vakitde huzûr-ı Müslimîn[de] bi-emri’llâhi te‘âlâ vefâtım müyesser olundukda terekemin sülüsünden olmak mecmû‘u bin iki yüz akçe kıymetli mu‘âyene ve müşâhede olunan memlû bir köhne minder ve bir orta iki yan keçesi ve bir yorgan ve bir sini ve bir tencere ve bir sagīr tencere ve bir sini ve iki köhne ve iki müsta‘mel yasdık ve bir seccâde ile yirmi guruş verilmek üzere vasiyyet ve vesâyâsının icrâsını tenfîz işbu mezbûr Mehmed Çelebi’yi vasiyy-i muhtâr nasb u ta‘yîn edip musırran alâ-îsâʼihî fevt olup terekesinin sülüsü dahi vefâ etmekle terekesinden bi’l-vekâle taleb ederim, suâl olunup alıverilmesi matlûbumdur dedikde gıbbe’s-suâl mezbûr Mehmed Çelebi cevâbında müteveffât-ı mezbûre Fâtıma’nın bâ-hüccet-i şer‘iyye ber-vech-i muharrer vesâyâsının icrâsını tenfîze vasiyy-i muhtâr olduğunu ikrâr lâkin müvekkile-i mezbûreye vasiyyeti ma‘lûmum değildir deyü münkir olmağın müdde‘î vekîl-i mezbûr Süleyman Çelebi’den müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûre sâkinlerinden Osman Çelebi b. Hasan ve Hasan Çelebi b. Murad nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î vekîl-i mezbûrun müvekkilesi Zeyneb bt. Mehmed nâm hatun medîne-i mezbûrede Servi Mahallesi’nde vefât eden Fâtıma bt. Mustafa nâm hatuna târîh-i kitâbdan iki sene mukaddem zikr olunan Sultan Hamamı kurbünde sâkine iken hasta olup müvekkile-i mezbûrenin bir seneden mütecâviz hastalığında hizmeti sebkat ettikden bi-emri’llâhi te‘âlâ vefâtım müyesser olundukda terekemin sülüsünden olmak üzere işbu mecmû‘u bin iki yüz akçe kıymetli bir orta ve iki köhne yan keçesi ve bir yorgan ve bir sini ve bir tencere ve bir sagīr tencere ve bir minder ve iki köhne ve iki müsta‘mel yasdık ve bir seccâde ile yirmi guruş verile deyü vasiyyet ve vesâyâsının icrâsını tenfîze işbu mezbûr Mehmed Çelebi’yi vasiyy-i muhtâr nasb u ta‘yîn ve musırran alâ-îsâʼihî vefât eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müteveffât-ı mezbûre Fâtıma’nın terekesinin sülüsünden müvekkile-i mezbûre Zeyneb zikr olunan bin iki yüz akçe kıymetli eşyâ ile meblağ-ı mezbûr yirmi guruşu edâ ve teslîme vasiyy-i mezbûr Mehmed Çelebi’ye baʻde’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Saferi’l-hayr li-sene tisʻa ve hamsîn ve mi’e ve elf. Şuhûdü’l-hâl: Mehmed Said Efendi b. İbrahim, Mehmed Efendi b. Muslihiddin, Halil Çelebi b. İbrahim, Hüseyin Çelebi b. Mehmed, Mehmed Çelebi b. Receb, Ahmed Efendi b. Ahmed, Halil Efendi el-Mukayyid.