Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 291 Hüküm no: 238 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Değirmenci Nikola’nın hayatta iken vasiyetini yerine getirmek ve terekesini vârislerine ulaştırmak üzere Bakkal Dimitri’yi vasi tayin etmiş olduğu Vilâyet-i Rumeli’nde Kerpiniş kazâsına tâbi‘ Papanos karyesi ahâlîsinden olup Havâss-ı Refîʻa kazâsında Çırpıcı Çayırı kurbünde Basmacılar’da vâki‘ mevâlî-i izâmdan Veliyüddin Efendi hazretleri bostanı demekle ma‘rûf bostanda mütemekkin iken bundan akdem hâlik olan bağçevân tâifesinden ve Değirmenci Nikola v. Yani nâm zimmînin ber-vech-i âtî vasiyy-i muhtârı olduğunu iddiʻâ eden işbu râfiʻü’s-sifr Bakkāl Dimitri v. Panayot nâm zimmî meclis-i şer‘-i şerîf-i enverde Hâslar beytülmâlını kabza meʼmûr olup tereke-i hâlik-i mezbûra bi’l-emâne vaz‘-ı yed eden es-Seyyid Ali Ağa b. Mustafa mahzarında üzerine da‘vâ ve takrîr-i kelâm edip hâlik-i mezbûr Nikola v. Yani v. Panayot nâm zimmî târîh-i kitâbdan kırk gün mukaddem ben bi-emri’llâhi te‘âlâ hâlik olduğumda cemî‘ terekem ve zimem-i nâsda olan hukūkum ahz u kabz olunup kadr-i ma‘rûf akçe ile lâşem zîr-i hâke idhâl için harc u sarf olundukdan sonra bâkī terekemden karye-i mezbûrede mütemekkine zevce-i metrûkem Kali bt. Yani nâm Nasrâniye ile sulbî oğlum Yorgo nâm zimmînin hisse-i irsiyyelerini ahz u kabz zabt u hıfza ve kendülere îsâle huzûr-ı Müslimîn’de beni vasiyy-i muhtâr nasb u ta‘yîn eylediğinde ben dahi ber-vech-i muharrer vesâyet-i mezbûreyi muvâcehesinde baʻde’l-kabûl mesfûr Nikola zimmî musırran alâ-îsâʼihî hâlik olmağla tenfîz-i vesâyâ murâd eylediğimde emîn-i merkūm tereke-i hâlik-i mesfûra bi’l-emâne bi-gayr-ı hakkın vaz‘-ı yed eder, suâl olunup kasr-ı yedine tenbîh olunmak bi’l-vesâye matlûbumdur dedikde gıbbe’s-suâl emîn-i merkūm cevâbında tereke-i hâlik-i mezbûra vaz‘-ı yedini ikrâr lâkin müdde‘î-i mesfûr ber-vech-i muharrer vasiyy-i muhtâr olduğunu inkâr edicek, müdde‘î-i mesfûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahmiye-i İstanbul’da Kâtib Muslihiddin Mahallesiʼnde sâkin İmâm Ebussuud Efendi b. Ahmed Efendi ve el-Hâc Ali Efendi b. Süleyman nâm kimesneler li-ecli’ş-şehâde meclis-i şer‘a hâzırân olup isre’l-istişhâh fi’l-hakīka hâlik-i mesfûr Nikola v. Yani v. Panayot nâm zimmî târîh-i kitâbdan kırk gün mukaddem ben bi-emri’llâhi te‘âlâ hâlik olduğumda cemî‘ terekem ve zimem-i nâsda olan hukūkum ahz u kabz olunup kadr-i ma‘rûf akçe ile lâşem zîr-i hâke idhâl için harc u sarf olundukdan sonra bâkī terekemden karye-i mezbûrede mütemekkin zevce-i metrûkem Kali bt. Yani nâm Nasrâniye ile sulbî oğlum Yorgo nâm zimmînin hisse-i irsiyyelerini ahz u kabz ve zabt u hıfza ve kendülere îsâle işbu müdde‘î-i mesfûr Bakkāl Dimitri nâm zimmîyi bizim huzûrumuzda vasiyy-i muhtâr nasb u ta‘yîn eylediğinde ol dahi ber-vech-i muharrer vesâyet-i mezbûreyi muvâcehesinde baʻde’l-kabûl mesfûr Nikola musırran alâ-îsâʼihî hâlik oldu, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûrun vesâyetine baʻde’l-hükm mâ-hüve’l-vâki‘ bi’t-taleb ketb olundu. Fi’l-yevmi’t-tâsiʻ ve’l-ışrîn min-Saferi’l-hayr li-sene tisʻa ve hamsîn ve mi’e ve elf. Şuhûdü’l-hâl: Çiftçiler Kethüdâsı Mehmed Ağa b. el-Hâc İbrahim, Ahmed Efendi b. İbrahim, el-Hâc Murtaza b. Ahmed, el-Hâc Ali b. Süleyman, Ahmed Efendi b. Mustafa.