Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 292 Hüküm no: 239 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Değirmenci tâifesinden Bahçıvan Nikola’nın vârislerine taksim edilen terekesi Vilâyet-i Rumeli’nde Kerpiniş kazâsına tâbi‘ Papanos karyesi ahâlîsinden olup Havâss-ı Refîʻa kazâsında Çırpıcı Çayırı kurbünde Basmacılar’da vâki‘ mevâlî-i izâmdan Veliyüddin Efendi Bostanı demekle ma‘rûf bostanda mütemekkin iken bundan akdem hâlik olan Değirmenci tâifesinden Bağçevân Nikola v. Yani nâm zimmînin [verâseti] karye-i mezbûrede mütemekkine zevce-i metrûkesi Kali bt. Yani nâm Nasrâniye ile sulbî oğlu Yorgo nâm zimmîye munhâsıra olduğu şer‘an zâhir ve müteʻayyen oldukdan sonra mezbûrân Kali ve Yorgo nâm zimmînin hisse-i irsiyyelerini ahz u kabz zabt u hıfz ve kendülere îsâle bâ-hüccet-i şer‘iyye vasiyy-i muhtârları olan Bakkāl Dimitri v. Panayot nâm zimmî taleb ve ma‘rifetiyle tahrîr ve takvîm olunan tereke-i hâlik-i mezbûrdur ki ber-vech-i âtî zikr olunur. Fi’l-yevmi’t-tâsiʻ ve’l-ışrîn min-Saferi’l-hayr sene tisʻa ve hamsîn ve mi’e ve elf, 1159. Bostan-ı mezbûrda sekiz nefer zimmîler şerîkler olmağla bostan-ı mezbûr derûnunda mezrû‘ sebzevât ve âlât-ı bostan ve mezrû‘ hınta ve der-anbar ve alef ve üç çift karasığır öküzü ve üç bârgir ve sâir âlât-ı çifti çiftçiler kethüdâsı ve sâir ustaların takvîmleri üzere hâlik-i mesfûr sümün hissesine isâbet eden meblağ: 22.090 Mâl-ı şirketden hâlik-i mesfûrun nukūdu 1.920 akçe Cem‘an yekûn: 24.000 akçe. Yalnız yirmi dört bin akçedir. Minhâ [el-ihrâcât]: Tahlîs-i beytülmâl için vasiyy-i mezbûrun verdiği 1.320 akçe Resm-i âdî 600 akçe Ücret ve kalemiye-i kâtib 240 akçe Çukadâriye 180 akçe İhzâriye 150 akçe [60b] Harc-ı hüccet-i vasiyy-i muhtâr 360 akçe Muhamminiye ve sâir mesârif-i lâzıme 680 akçe Ücret-i bârgir 135 akçe Kaydiye-i defter 60 akçe Yekûnü’l-ihrâcât: 3.705 akçe. Sahhe’l-bâkī li’t-taksîm beyne’l-verese: 20.295 akçe. Hissetü’z-zevceti’l-mezbûre 3.546 akçe Hissetü’l-ibni’l-mezbûr 16.749 akçe