Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 294 Hüküm no: 240 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurşuncu Osman Çelebi’nin terekesinden küçük çocukları Numan ve Mustafa’ya nafaka tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Fethi Çelebi Mahallesi sâkinlerinden olup vilâyet-i Anadolu’da Amasya kazâsında vefât eden Kurşuncu Osman Çelebi b. Ali’nin sulbî sagīr oğulları Numan ve Mustafa’nın vâlideleri ve tesviye-i emirlerine mansûbe vasiyyeleri olup zâtı ta‘rîf-i şer‘î ile mu‘arrefe olan işbu râfiʻatü’l-kitâb Fâtıma Hatun bt. Mehmed meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasiyyeleri olduğum sagīrân-ı mezbûrânın nafaka ve kisveye eşedd-i ihtiyâçları olmağla babaları müteveffâ-i mezbûrdan müntakil mâlından kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyye-i mezbûrenin kelimât-ı [meşrûhası] vâkıʻa mutâbık olmak zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīrân-ı mezbûrâna beher yevm herbirine ikişer para nafaka ve kisve-bahâ farz ve takdîr buyurup meblağ-ı mefrûz-ı mezbûru sagīrân-ı mezbûrânın nafaka ve kisvelerine harc u sarfa ve lede’l-iktizâ istidâne ve inde’z-zafer mâlından rücû‘a vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’s-sâmin min-Rebîʻi’l-evvel sene tisʻa ve hamsîn ve mi’e ve elf. Şuhûdü’l-hâl: el-Hâc Mehmed Efendi b. ( ), Müezzin Mollâ Hüseyin b. Mahmud, Bostanî Mehmed b. ( ), es-Seyyid Mehmed b. es-Seyyid Mustafa, es-Seyyid Ahmed [b.] es-Seyyid Mehmed.