Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 295 Hüküm no: 242 Orijinal metin no: [60b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa bostancı ustalarından Mustafa Usta’nın vefâtıyla küçük oğlu Mustafa’ya annesi Hatice Hatun’un vasi tayin edilmesi Havâss-ı Refîʻa kazâsında Cuhûd Bergos karyesinde vâki‘ Hadâik-i Hâssa ustası iken bundan akdem vefât eden Mustafa Usta Ağa b. Mehmed’in sulbî sagīr oğlu Mustafa’nın tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûfe ve diyânet ile mevsûfe ve her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīr-i mezbûrun vâlidesi işbu râfiʻatü’l-kitâb Hadice Hatun bt. Mehmed’i hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûrun tesviye-i umûruna vasî nasb u ta‘yîn buyurdukda ol dahi vech-i muharrer vesâyet-i mezbûreyi kabûl ve hizmet-i lâzımelerin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâlis min-şehri Rebîʻi’l-evvel li-sene tisʻa ve hamsîn ve mi’e ve elf. Şuhûdü’l-hâl: Vâlide Sarayı [Ustası] es-Seyyid Ali Usta Ağa b. ( ), Sebzehâne kâtibi Ahmed Efendi b. ( ), İsmail Efendi b. Mahmud, el-Hâc Mustafa b. el-Hâc Hüseyin, Hüseyin Bölükbaşı b. Mehmed.