Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 296 Hüküm no: 243 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Helvacı Süleyman Çelebi’nin mülk evini istiğlal yoluyla satması Medîne-i Hazret-i Ebî Eyyüb el-Ensârî -radiye anhu rabbihi’l-bârî-’de Çavuş Kasım Mahallesiʼnde sâkin Helvacı Süleyman Çelebi b. Ali meclis-i şer‘-i şerîf-i enverde medîne-i mezbûrede Câmi‘-i Kebîr Mahallesiʼnde sâkin iken bundan akdem vefât eden es-Seyyid Hasan b. Abdullah’ın sulbiye sagīre kızı Şerife Ümmügülsüm’ün ceddesi ve tesviye-i umûruna vasiyyesi olup zâtı ta‘rîf-i şer‘î ile mu‘arrefe olan işbu râfiʻatü’l-kitâb Fâtıma Hatun bt. Abdullah mahzarında ikrâr-ı tâm ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Ali Çelebi menzili ve bir tarafdan âhar mülküm ve bir tarafdan mekābir-i Müslimîn ve bir tarafdan tarîk-i âm ile mahdûd büyût-ı adîdeyi muhtevî mülk menzilimi vasiyye-i mezbûre Fâtıma Hatun’a bi-tarîkı’l-istiğlâl iki yüz guruşa beyʻ ve temlîk ve teslîm eylediğimde ol dahi ber-vech-i muharrer sagīre-i mezbûrenin mâlıyla bi’l-vesâye iştirâ ve temellük ve tesellüm ve kabûl ve kabz eylediğinden sonra meblağ-ı mezbûr iki yüz guruşu vasiyye-i mezbûre Fâtıma Hatun yedinden bi’t-tamam ahz u kabz eylediğimden sonra vasiyye-i mezbûre menzil-i mahdûd-ı mezkûru ba‘de’t-tahliyyeti’ş-şer‘iyye ve tekābuzi’l-merʻî târîh-i kitâbdan bir sene tamamına değin vasiyye-i mezbûre Fâtıma Hatun beher şehr ikişer yüz akçeye menzil-i mahdûd-ı mezkûru bana îcâr eylediğinde ben dahi ber-vech-i muharrer istîcâr ve kabûl eyledim dedikde gıbbe’t-tasdîki’ş-şerʻî mâ-vaka‘a bi’t-taleb ketb olundu. Fi’l-yevmi’l-hâdî aşer min-Rebîʻi’l-evvel li-sene tisʻa ve hamsîn ve mi’e ve elf. Şuhûdü’l-hâl: el-Hâc Mehmed Efendi b. ( ), Mollâ Hüseyin b. Mahmud, Mustafa Çelebi b. Süleyman, es-Seyyid Mustafa Efendi b. es-Seyyid Ahmed, es-Seyyid Mehmed b. es-Seyyid Mustafa.