Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 312 Hüküm no: 251 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Abdullah’ın vefât eden ortağı Bakkal el-Hâc Mustafa Beşe’deki alacağını terekesinden almak istemesi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Şah Sultan Mahallesiʼnde sâkin iken bundan akdem vefât eden Bakkāl el-Hâc Mustafa Beşe b. Ahmed’in hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun muʻtıkı işbu râfiʻü’l-kitâb Osman b. Abdullah nâm kimesne meclis-i ma‘kūd-ı mezkûrda müteveffâ-i mezbûrun zî-rahm cihetinden vârisi ve hâlesi oğlu olup terekesine bi’l-verâse vâzıʻu’l-yed olan Abdullah Beşe b. Süleyman mahzarında üzerine da‘vâ ve takrîr-i kelâm edip müteveffâ-i mezbûr Bakkāl el-Hâc Mustafa Beşe b. Ahmed b. Abdullah ile bakkāllık sanʻatında şirket-i inân ile şerîkler olup hesâb ve kitâb gördüğümüzde mâl-ı şirketden üç yüz on bir buçuk guruş zimmetinde hakkım zuhûr edip hatta müteveffâ-i mezbûr hâl-i hayâtında ve kemâl-i akl [u] sıhhatinde târîh-i kitâbdan bir sene mukaddem meblağ-ı mezbûr cihet-i merkūmeden zimmetinde bana vâcibü’l-edâ deyn olduğunu huzûr-ı Müslimîn’de kirâren ve mirâren ikrâr ve işhâd edip kable’l-edâ fevt olmağla meblağ-ı mezbûru terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den medîne-i mezbûrede Çavuş Kasım Mahallesi sâkinlerinden el-Hâc İbrahim b. el-Hâc Mehmed ve Mollâ Ali b. Şaʻban nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mezbûr Bakkāl el-Hâc Mustafa Beşe b. Ahmed b. Abdullah ile işbu muʻtıkı müdde‘î-i mezbûr Osman bakkāllık sanʻatında şirket-i inân ile şerîkler olup hesâb ve kitâb gördüklerinde mâl-ı şirketden üç yüz on bir buçuk guruş işbu müdde‘î-i mezbûrun hakkı zuhûr edip hatta müteveffâ-i mezbûr hâl-i hayâtında ve kemâl-i akl [u] sıhhatinde târîh-i kitâbdan bir sene mukaddem meblağ-ı mezbûr cihet-i merkūmeden zimmetinde müdde‘î-i mezbûra vâcibü’l-edâ deyn olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr ba‘dehû ma‘an ba‘s olunan ümenâ-i şer‘den Çukadâr Ahmed Ağa ve Muhzır es-Seyyid Ahmed ile meclis-i şer‘a gelip herbiri alâ-vukū‘ihî inhâ ve takrîr etmeğin hükm-i mezbûr tenfîz olunmağın mâ-vaka‘a bi’t-taleb ketb olundu. Fi’l-yevmi’s-sâbiʻ aşer min-Rebîʻi’l-evvel li-sene tisʻa ve hamsîn ve mi’e ve elf. Şuhûdü’l-hâl: Ahmed Ağa b. Mustafa, Mustafa Beşe, Abdi Bey b. Ali, Halil Çelebi b. İbrahim, Mehmed b. Abdullah, es-Seyyid Mehmed [b.] es-Seyyid Mustafa.