Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 317 Hüküm no: 255 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Ağriya’nın terekesinden küçük oğluna nafaka tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Baba Haydarî Nakşibendî Mahallesi’nde mütemekkin iken bundan akdem hâlik olan Serkiz v. Agriya nâm Ermeninin sulbî sagīr oğlu Manasgar’ın anası ve tesviye-i umûruna kıbel-i şer‘den bâ-hüccet-i şer‘iyye mansûb vasiyyesi olan işbu râfiʻatü’s-sifr Ferafyon? bt. Kestor nâm Ermeniye meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasiyyesi olduğum sagīr-i mezbûrun nafaka ve kisveye eşedd-i ihtiyâcı olmağla babası hâlik-i mezbûrdan müntakil hissesinden kadr-i ma‘rûf nafaka ve kisve-bahâ farz [ve] takdîr buyrulmak matlûbumdur dedikde vasiyye-i mezbûrenin kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûra babası hâlik-i mezbûrdan müntakil mâl-ı mevrûsundan beher yevm dörder akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisvesine harc u sarfa ve lede’l-iktizâ istidâneye ve inde’z-zafer mâlından rücû‘a vasiyye-i mezbûre[ye] izin vermeğin mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Rebîʻi’l-evvel li-sene tisʻa ve hamsîn ve mi’e ve elf, 1159. Şuhûdü’l-hâl: Ahmed Efendi b. Mustafa Efendi, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Halil Çelebi b. İbrahim, Hüseyin Çelebi b. İbrahim, Halil Efendi el-Mukayyid. Papa Asvador v. Avanis, Marun v. Artin, Karabet v. Artin, Avanis v. Asari.