Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 318 Hüküm no: 257 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seltane bt. Bağdik’in ölümüyle küçük çocuklarına babaları Devlet v. İsrail’in vasi tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Baba Haydarî Nakşibendî Mahallesi’nde mütemekkine iken bundan akdem hâlike olan Seltane bt. Bağdik nâm Ermeniyenin sadrî sagīr oğulları Piro ve Melkon ile sadriye sagīre kızları Aksani ve Oskoher ve Toto’nun tesviye-i emirlerine kıbel-i şer‘den bir vasî nasbı lâzım ve mühim olmağın sagīrûn-ı mezbûrûnun babaları olup her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfiʻü’s-sifr Devlet v. İsrail nâm Ermeniyi hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīrûn-ı mezbûrûnun tesviye-i emirlerine vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâbiʻ ve’l-ışrîn min-Rebîʻi’l-evvel sene tisʻa ve hamsîn ve mi’e ve elf, 1159. Şuhûdü’l-hâl: Ahmed Efendi b. Mustafa Efendi, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Halil Çelebi b. İbrahim, Hüseyin Çelebi b. Mehmed, Halil [Efendi] el-Mukayyid. Papa Asvador v. Avanis, Papa Totos v. Manik, Artin v. Avanis, Bağdik v. Sarayil, diğer Bağdik v. Sarayil, Manuk v. Tatos.