Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 319 Hüküm no: 258 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seltane bt. Bağdik’in terekesinden küçük çocuklarına nafaka tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Baba Haydarî Nakşibendî Mahallesi’nde mütemekkin[e] iken bundan akdem hâlike olan Seltane bt. Bağdik nâm Ermeniyenin sadrî sagīr oğulları Piro ve Melkon ile sadriye sagīre kızları Aksani ve Oskoher ve Toto’nun babaları ve tesviye-i emirlerine kıbel-i şer‘den mansûb vasîleri olan işbu râfiʻü’s-sifr Devlet v. İsrail nâm Ermeni meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasîleri olduğum sagīrûn-ı mezbûrûnun nafaka ve kisveye eşedd-i ihtiyâçları olmağla anaları hâlike-i mezbûreden müntakil mâl-ı mevrûslarından kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīrûn-ı mezbûrûnun anaları hâlike-i mezbûreden müntakil mâl-ı mevrûslarından herbirine beher yevm üçer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīrûn-ı mezbûrûnun nafaka ve kisvelerine harc u sarfa ve lede’l-iktizâ istidâneye ve inde’z-zafer mâllarına rücû‘a vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’s-sâbiʻ ve’l-ışrîn min-Rebîʻi’l-evvel li-sene tisʻa ve hamsîn ve mi’e ve elf. Şuhûdü’l-hâl: Eş-Şâhidûnü’s-sâbıkūn.