Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 320 Hüküm no: 259 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seltane bt. Bağdik’in vârislerinden olan annesi ile babasının terekeden hisselerini alacakları Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Ahmed Efendi b. Mustafa irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Baba Haydarî Nakşibendî Mahallesi’nde mütemekkine iken bundan akdem hâlike olan Seltane bt. Bağdik nâm Ermeniyenin hayâtında mütemekkine olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde hâlike-i mezbûrenin verâseti zevc-i metrûku Devlet v. İsrail ile babası Bağdik v. Tatos’a ve anası Maryem bt. Eznora ve sadrî sagīr oğulları Seryo ve Melkon’a ve sadriye sagīre kızları Aksani ve Oskohere ve Toto’ya münhasıra ve tashîh-i meseleleri seksen dört sehmden i‘tibâr olunup sihâm-ı mezbûreden yirmi bir sehmi zevc-i mezbûr Dolet’e ve on dörder sehmi mezbûrân Bağdik ve Maryem’e ve onar sehmi sagīrân-ı mezbûrân Seryo ve Melkon’a ve beşer sehmi sagīrât-ı mezbûrât Aksani ve Oskohere ve Toto’ya isâbeti tahakkukundan sonra şahsı ta‘rîf-i şer‘î ile mu‘arrefe olan mesfûre Maryem nâm Ermeniye ile mesfûr Bağdik nâm Ermeni meclis-i ma‘kūd-ı mezkûrda sagīrûn-ı mezbûrûnun babaları ve tesviye-i emirlerine kıbel-i şer‘den bâ-hüccet-i şer‘iyye mansûb vasîleri olup tereke-i hâlike-i mesfûreye bi’l-verâse ve bi’l-vesâye vâzıʻu’l-yed olan işbu râfiʻü’s-sifr mesfûr Devlet nâm Ermeni muvâcehesinde herbiri bi’l-verâse ikrâr-ı tâm ve takrîr-i kelâm edip kızımız hâlike-i mezbûrenin terekesi tahrîr ve ba‘de ihrâci’l-mesârif ve’d-düyûn ber-mûceb-i defter-i kassâm tashîh-i merkūm üzere herbirimize isâbet eden ikişer bin dörder yüz doksan ikişer akçe terekeden olmak üzere mesfûr Devlet nâm Ermeni bize def‘ ve teslîm biz dahi ber-vech-i muharrer meblağ-ı mezbûru yedinden herbirimiz bi’l-verâse ahz u kabz eyledik, baʻde’l-yevm kızımız hâlike-i mezbûrenin terekesine müte‘allika âmme-i mîrâs da‘vâsından mesfûr Devlet nâm Ermeninin zimmetini herbirimiz bi’l-verâse ibrâ ve ıskāt eylediğimizde ol dahi kezâlik benim zimmetimi ibrâ ve ıskāt edip vechen mine’l-vücûh ve sebeben mine’l-esbâb katʻâ birbirimiz ile husûs-ı mîrâsa müte‘allika da‘vâ nizâ‘ımız yokdur dediklerinde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbiʻ ve’l-ışrîn min-Rebîʻi’l-evvel sene tisʻa ve hamsîn ve mi’e ve elf, 1159. Şuhûdü’l-hâl: Eş-Şâhidûnü’s-sâbıkūn.