Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 321 Hüküm no: 260 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Hüseyin Beşe’nin küçük oğlunun reşid olması üzerine intikal eden terekeyi talebi Hoşabçı tâifesinden olup medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Hüseyin Beşe b. Salih’in sulbî oğlu olup ve sin [ve] cüssesinin bülûğa tahammülü olduğunu mukır ve mu‘terif olan işbu râfiʻü’l-kitâb İsmail nâm kimesne meclis-i şer‘-i şerîf-i enverde hâl-i sugrunda vasîsi olan Hüseyin Beşe b. Hasan mahzarında üzerine da‘vâ ve takrîr-i kelâm edip mezbûr Hüseyin benim hâl-i sugrumda vasîm olup babam müteveffâ-i mezbûrdan müntakil ber-mûceb-i defter-i müfredât eşyâ-i ma‘lûmeden makbûzunu taleb ederim, suâl olunsun dedikde gıbbe’s-suâl mezbûr Hüseyin cevâbında müteveffâ-i mezbûrdan müntakil ber-mûceb-i defter-i müfredât eşyâ-i ma‘lûmesinden bi’l-vesâye makbûzu olduğunu ikrâr lâkin müdde‘î-i mezbûrun ber-vech-i muharrer bülûğunu inkâr edicek, müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den medîne-i mezbûrede Câmi‘-i Kebîr’de sâkin Helvacı el-Hâc Süleyman b. Ali ve Mustafa Beşe b. Hasan nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î-i mezbûr İsmail nâm kimesnenin sinni [ve] cüssesinin bülûğa tahammülü olup âkıl ve bâliğ ve reşiddir ve mâlını hıfz u hırâsete kādirdir, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûrun babası müteveffâ-i mezbûrdan müntakil merkūm Hüseyin nâm kimesnenin ber-mûceb-i defter-i müfredât makbûzu olan eşyâ-i ma‘lûmeyi müdde‘î-i mezbûr İsmail’e teslîme merkūm Hüseyin’e tenbîh-birle mâ-vaka‘a bi’t-taleb ketb olundu. Fi’l-yevmi’s-sânî min-Rebîʻülâhire li-sene tisʻa ve hamsîn ve mi’e ve elf, 1159. Şuhûdü’l-hâl: Ahmed Efendi b. Mustafa, Bayrakdâr Hüseyin Beşe b. Salih, Berber Mustafa Çelebi b. Osman, Hatîb Mehmed Efendi b. Mustafa.