Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 321 Hüküm no: 261 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurra Vakfı mütevellîsi el-Hâc Mehmed Efendi’nin Bakkal el-Hâc Mustafa Beşe’nin hayatta iken vakfedip malına karıştırdığı parayı terekesinden almak istemesi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Şah Sultan Mahallesiʼnde sâkin iken bundan akdem vefât eden Bakkāl el-Hâc Mustafa Beşe b. Ahmed’in hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde medîne-i mezbûrede Câmi‘-i Kebîr’de hâlâ imâm-ı evvel olup işbu kitâb-ı sıhhat-nisâbın sâhibi fahrü’l-eimme el-Hâc Mehmed Efendi b. Mustafa Efendi meclis-i ma‘kūd-ı mezkûrda müteveffâ-i mezbûrun zî-rahm cihetinden hâlesi oğlu ve terekesine bi’l-verâse vazʻ-ı yed eden Abdullah Beşe b. Ali mahzarında üzerine da‘vâ ve takrîr-i kelâm edip müteveffâ-i mezbûr Bakkāl el-Hâc Mustafa Beşe b. Ahmed b. Abdullah bin yüz elli beş senesi târîhiyle muʻanven mümzâ ve mahtûm vakfiyesinin şürût ve kuyûdu merreten ba‘de uhrâ yedimde olsun deyü şart ve ta‘yîn eylediği Kurrâ Vakfı’nın tevliyetini vâkıf-ı mezbûr fevtinden beş gün mukaddem bana ve benim evlâd-ı evlâd-ı evlâd-ı evlâd-ı evlâdıma şart ve ta‘yîn etmekle vâkıf-ı mezbûr Bakkāl el-Hâc Mustafa Beşe hîn-i tevliyetinde vakf eylediği dokuz yüz guruşu kendi mâlına halt ve mesârifine sarfla istihlâk eyledim deyü şuhûd muvâcehesinde kirâren ve mirâren ikrâr ve işhâd edip meblağ-ı mezbûru cânib-i vakf-ı mezbûra kable’l-edâ fevt olmağla ber-vech-i meşrûta mütevellîsi olduğuma binâen meblağ-ı mezbûr dokuz yüz guruşu müteveffâ-i mezbûrun terekesinden taleb ederim, suâl olunsun dedikde gıbbe’s-suâl ve’l-inkâr mütevellî-i mûmâ-ileyh el-Hâc Mehmed Efendi’den müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûrede sâkin Ahmed Çelebi b. Ali ve Ali Ağa b. Mehmed ve Bayrakdâr Mehmed Ağa b. İbrahim nâm kimesneler li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka müteveffâ-i mezbûr Bakkāl el-Hâc Mustafa Beşe b. Ahmed b. Abdullah bin yüz elli beş senesi târîhiyle muʻanven mümzâ ve mahtûm vakfiyesinin şürût ve kuyûdu merreten ba‘de uhrâ yedimde olsun [68a] deyü şart ve ta‘yîn eylediği Kurrâ Vakfı’nın tevliyetini vâkıf-ı mezbûr fevtinden beş gün mukaddem işbu müdde‘î-i mûmâ-ileyh el-Hâc Mehmed Efendi’ye ve ânın evlâd-ı evlâd-ı evlâd-ı evlâd-ı evlâdına şart ve ta‘yîn etmekle vâkıf-ı mezbûr Bakkāl el-Hâc Mustafa Beşe hîn-i tevliyetinde vakf eylediği dokuz yüz guruşu kendi mâlına halt ve mesârifine sarfla istihlâk eyledim deyü bizim huzûrumuzda kirâren ve mirâren ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mütevellî-i mûmâ-ileyh el-Hâc Mehmed Efendi’nin sunʻu olmamağla yemîn teveccüh etmeyip mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan ümenâ-i şer‘den Çukadâr Ahmed Ağa ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbiʻ ve’l-ışrîn min-Rebîʻi’l-evvel li-sene tisʻa ve hamsîn ve mi’e ve elf. Şuhûdü’l-hâl: Ahmed Ağa b. Mustafa, Mustafa Beşe b. ( ), Abdi Bey b. Ali, Ali Beşe b. Hasan, el-Hâc Mehmed Ağa b. el-Hâc Hüseyin, Mustafa Çelebi b. Hasan, Ahmed Efendi b. Mustafa, es-Seyyid Mehmed b. es-Seyyid Mustafa, es-Seyyid Ahmed b. es-Seyyid Mehmed, Halil Çelebi b. İbrahim, eş-Şeyh es-Seyyid Abdurrahman Efendi [b.] es-Seyyid Yusuf, Ali Usta Ağa b. Mustafa, Mollâ Ali b. Hasan, Mustafa Çelebi b. Hüseyin, Hüseyin Çelebi b. Mehmed, Mehmed b. Abdullah.