Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 323 Hüküm no: 262 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un vefâtı üzerine küçük kızı Hanife’ye vasi ve nazır tayini Medîne-i Hazret-i [Ebî] Eyyüb el-Ensârî -aleyhi rahmetü rabbihi’l-bârî-’de Takyecibaşı Mahallesiʼnde sâkine iken bundan akdem vefât eden Fâtıma Hatun bt. Derviş Ahmed’in sadriye sagīre kızı Hanife’nin tesviye-i umûruna kıbel-i şer‘den bir vasî nasbı lâzım ve mühim olmağın sagīre-i mezbûrenin babası olup mahmûdü’l-hâl idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfiʻü’l-kitâb Osman Çelebi b. Mehmed’i hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin tesviye-i umûruna vasî nasb u ta‘yîn ve üzerine işbu hâzır bi’l-meclis sagīre-i mezbûrenin min-kıbeli’l-üm ceddi Derviş Ahmed b. Mehmed’i nâzır nasb u ta‘yîn buyurduklarında ânlar dahi herbiri ber-vech-i muharrer vesâyet ve nezâret-i mezbûreyi kabûl ve hizmet-i lâzımelerin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Rebîʻülâhir li-sene tisʻa ve hamsîn ve mi’e ve elf, 1159. Şuhûdü’l-hâl: Eş-Şeyh el-Hâc İbrahim Efendi b. Mehmed, Mehmed Ali b. el-Hâc İbrahim, Hasan Beşe b. Hızır, Mollâ Mehmed [b.] Mustafa, Mollâ Ali b. Ali, Ahmed b. Abdullah, Feyzullah [b.] Mustafa.