Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 325 Hüküm no: 264 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccardan Kalef adlı Yahûdi’nin vefât eden el-Hâc Osman’daki alacağını terekesinden tahsili Husûs-ı âti’l-beyânın mahallinde istimâ‘ ve tahrîri için bu fakīr medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Cezerî Kasım Paşa Mahallesi ahâlîsinden sâbıkā bostancıbaşı olup bundan akdem vedâʻ-ı âlem-i fânî eden el-Hâc Osman Ağa b. Hasan’ın hayâtında sâkin oldukları menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde bâzergân tâifesinden işbu râfiʻü’s-sifr Kalef v. ( ) nâm Yahûdi tarafından husûs-ı âti’l-beyânda müseccel vekîli Haseki Kādızâde İbrahim Ağa b. Abdullah meclis-i ma‘kūd-ı mezkûrda müteveffâ-i mûmâ-ileyhin zâhirde zevce-i menkûha-i metrûkesi Fâtıma Hatun bt. Mustafa’dan gayrı vâris-i ma‘rûfesi olmayıp bilâ-veled fevt olanların beytülmâlını bâ-hatt-ı hümâyûn-ı şevket-makrûn kabzına meʼmûr olan iftihârü’l-havâs ve’l-mukarrabîn muʻtemedü’l-mülûk ve’s-selâtîn bi’l-fi‘il bostancıbaşı sa‘âdetlü Hüseyin Ağa hazretlerinin hâlâ terekecibaşı hizmetleriyle şeref-mend olup tereke-i müteveffâ-i mûmâ-ileyh bi’l-emâne vâzıʻu’l-yed olan fahrü’l-akrân Mustafa Ağa b. İsmail ile müteveffâ-i mûmâ-ileyhin sülüsünü tenfîze bâ-hüccet-i şer‘iyye vasiyy-i muhtârı olan Ahmed Ağa b. Mustafa mahzarlarında üzerlerine da‘vâ ve takrîr-i kelâm edip müteveffâ-i mûmâ-ileyh el-Hâc Osman Ağa b. Hüseyin b. Abdullah zimmetinde müvekkilim mesfûr Kalef nâm Yahûdi’nin eşyâ semeninden ba‘de külli’l-hesâb yüz kırk iki guruş hakkı olup hatta müteveffâ-i mûmâ-ileyh hâl-i hayâtında ve kemâl-i akl [u] sıhhatinde cihet-i mezkûreden müvekkil-i mesfûr Kalef nâm Yahûdi’ye zimmetinde ol kadar guruş vâcibü’l-edâ deyn olduğunu huzûr-ı Müslimîn’de kirâren ve mirâren ikrâr ve işhâd edip kable’l-edâ fevt olmağla meblağ-ı mezbûru terekesinden bi’l-vekâle taleb ederim, suâl olunsun dedikde gıbbe’s-suâl ve’l-inkâr vekîl-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûre sâkinlerinden Bostanî el-Hâc Mahmud b. Osman ve diğer Mahmud b. Yusuf nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mûmâ-ileyh el-Hâc Osman Ağa b. Hüseyin b. Abdullah zimmetinde müvekkil-i mesfûr Kalef nâm Yahûdi’nin eşyâ semeninden ba‘de külli’l-hesâb yüz kırk iki guruş hakkı olup hatta müteveffâ-i mûmâ-ileyh hâl-i hayâtında ve kemâl-i akl [u] sıhhatinde cihet-i mezkûreden müvekkil-i mesfûr Kalef nâm Yahûdi’ye zimmetinde ol kadar guruş vâcibü’l-edâ deyn olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mevkūfen ale’l-yemîn mûcebiyle baʻde’l-hükm mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min-Rebîʻi’l-evvel sene tisʻa ve hamsîn ve mi’e ve elf. Şuhûdü’l-hâl: Es-Seyyid Ali Usta Ağa, İsmail Efendi [b.] Mahmud, Bazarcı Hüseyin [b.] Mustafa, İbrahim Ağa [b.] Mehmed, el-Hâc Mahmud [b.] Osman, Mollâ Ömer [b.] Osman, Ali [b.] Abdullah, Halil b. İbrahim.