Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 326 Hüküm no: 265 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden el-Hâc Osman Ağa’nın hanımının miras hissesini aldığı Husûs-ı âti’l-beyânın mahallinde ketb u tahrîri için bu fakīr medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Cezerî Kasım Paşa Mahallesi ahâlîsinden sâbıkā bostancıbaşı olup bundan akdem vedâʻ-ı âlem-i fânî eden el-Hâc Osman Ağa b. Hüseyin’in hayâtında sâkin oldukları menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mûmâ-ileyhin zâhirde zevce-i menkûha-i metrûkesi Fâtıma Hatun bt. Mustafa’dan gayrı vâris-i ma‘rûfesi olmayıp müteveffâ-i mûmâ-ileyhin sülüs vasiyyeti [olmağla] tashîh-i meselesi on iki sehmden i‘tibâr olunup sihâm-ı mezbûreden dört sehmi sülüs vesâyâsına ve iki sehmi zevcesi mezbûreye ve altı sehmi cânib-i beytülmâla âid ve râciʻ olduğu şer‘an zâhir ve müteʻayyen oldukdan sonra zâtını zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan mezbûre Fâtıma Hatun meclis-i ma‘kūd-ı mezkûrda müteveffâ-i mûmâ-ileyhin terekesini bâ-hatt-ı hümâyûn-ı şevket-makrûn beytülmâl kabzına meʼmûr olan iftihârü’l-havâs ve’l-mukarrabîn muʻtemedü’l-mülûk ve’s-selâtîn [69a] bi’l-fi‘il bostancıbaşı sa‘âdetlü Hüseyin Ağa hazretlerinin taraf-ı bâhirü’ş-şerîflerinden sâbitü’l-vekâle vekîli olan hâlâ terekecibaşı hizmetleriyle şeref-mend olup tereke-i müteveffâ-i mûmâ-ileyhe bi’l-emâne vaz‘-ı yed eden fahrü’l-akrân işbu râfiʻü’l-kitâb Mustafa Ağa b. İsmail ile müteveffâ-i mûmâ-ileyhin sülüsünü tenfîze bâ-hüccet-i şer‘iyye vasiyy-i muhtârı olan Ahmed Ağa b. Mustafa mahzarlarında bi’l-verâse ikrâr-ı tâm ve takrîr-i kelâm edip zevcim müteveffâ-i mûmâ-ileyhin terekesi tahrîr ve ba‘de ihrâci’l-mesârif ve’d-düyûn ve’s-sülüs ber-mûceb-i defter-i kassâm tashîh-i merkūm üzere bana isâbet eden iki yük yirmi iki bin yirmi dokuz akçe hisse-i irsiyyem ve zevcim müteveffâ-i mûmâ-ileyhin zimmetinde mütekarrer ve ma‘kūdün-aleyh otuz bin akçe mehr-i müeccelim min-haysü’l-mecmû‘ iki yük elli iki bin yirmi dokuz akçeyi terekeden olmak üzere mezbûr Mustafa Ağa bi’l-emâne bana def‘ ve teslîm, ben dahi ber-vech-i muharrer meblağ-ı mezbûru yedinden bi’t-tamam ve’l-kemâl ahz u kabz eyledim, meblağ-ı mezbûrdan emîn-i merkūm Mustafa Ağa yedinde ve zimmetinde bir akçe ve bir habbe bâkī kalmayıp baʻde’l-yevm zevcim müteveffâ-i mûmâ-ileyhin terekesine müte‘allika âmme-i mîrâs da‘vâsından emîn-i merkūm Mustafa Ağa ile vasiyy-i mezbûr Ahmed Ağa’nın zimmetlerini bi’l-verâse ibrâ ve ıskāt edip vechen mine’l-vücûh ve sebeben mine’l-esbâb husûs-ı mezbûra müte‘allika katʻâ da‘vâ ve nizâ‘ım yokdur dedikde gıbbe’t-tasdîki’ş-şerʻî mâ-vaka‘a bi’t-taleb ketb olundu. Fi’l-yevmi’l-ışrîn min-Rebîʻi’l-evvel li-sene tisʻa ve hamsîn ve mi’e ve elf, 1159. Şuhûdü’l-hâl: Eş-Şâhidûnü’s-sâbıkūn.