Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 337 Hüküm no: 275 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musul canibinde vefât eden el-Hâc Ahmed’in vârislerinin hisselerini vasi el-Hâc Ali Ağa’dan aldıkları Fi’l-asl Vilâyet-i Rumeli’nde Filibe kazâsı ahâlîsinden olup mirâhûr-ı sânî iftihârü’l-emâcid ve’l-ekârim sa‘âdetlü el-Hâc Salih Ağa hazretlerinin vekîl-i harclık hizmetiyle şeref-yâb iken bundan akdem vilâyet-i Anadolu’da Musul cânibinde vefât eden el-Hâc Ahmed b. İbrahim’in verâseti zevce-i menkûha-i metrûkesi Hanife Hatun bt. Abdullah ile li-ebeveyn er karındaşı Mustafa Ağa’ya münhasıra olduğu şer‘an zâhir ve müteʻayyen oldukdan sonra zâtı ta‘rîf-i şer‘î ile mu‘arrefe olan mezbûre Hanife Hatun ile merkūm Mustafa Ağa medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de meclis-i şer‘-i şerîf-i enverde müteveffâ-i mezbûrdan isâbet eden hisse-i irsiyyelerini ahz u kabz zabt u hıfz ve kendülere îsâle kıbel-i şer‘den vasîleri olan hazînedâr işbu râfiʻü’l-kitâb fahrü’l-akrân el-Hâc Ali Ağa b. el-Hâc Mehmed mahzarında herbiri bi’l-verâse ikrâr ve takrîr-i kelâm edip mûrisimiz müteveffâ-i mezbûrdan ba‘de ihrâci’l-mesârif ve’d-düyûn ber-mûceb-i defter-i kassâm yirmi dört bin dokuz yüz altmış akçeyi terekeden olmak üzere vasiyy-i merkūm el-Hâc Ali Ağa bize def‘ ve teslîm biz dahi meblağ-ı mezbûru bi’l-verâse bi-kadri’l-hısas yedinden bi’t-tamam ahz u kabz eyledik, meblağ-ı mezbûrdan vasiyy-i merkūm el-Hâc Ali Ağa yedinde ve zimmetinde bir akçe ve bir habbe bâkī kalmayıp baʻde’l-yevm mûrisimiz müteveffâ-i mezbûrun hâric ez-defter ve dâhil-i defter kalîl ü kesîr terekesine müte‘allika âmme-i mîrâs da‘vâsından vasiyy-i merkūm el-Hâc Ali Ağa’nın zimmetini herbirimiz bi’l-verâse ve ıskāt eyledik, vechen mine’l-vücûh ve sebeben mine’l-esbâb husûs-ı mîrâsa müte‘allika katʻâ da‘vâ ve nizâ‘ımız yokdur dediklerinde gıbbe’t-tasdîki’ş-şerʻî mâ-vaka‘a bi’t-taleb ketb olundu. Fi’l-yevmi’l-ışrîn min-Rebîʻülâhir li-sene tisʻa ve hamsîn ve mi’e ve elf, 1159. [Şuhûdü’l-hâl]: Halil Ağa [b.] Mustafa, el-Hâc Ebûbekir [b.] Mehmed, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Hüseyin [b.] Mehmed, Ahmed Ağa [b.] Hamdi Mehmed ve Halil b. Ahmed.