Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 338 Hüküm no: 276 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Osman Beşe’nin Belgrad köyündeki ev ve bakkal dükkanını satması Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde vâki‘ Bakkāl Osman Beşe b. Abdullah’ın sâkin olduğu odasına varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde mezbûr Bakkāl Osman nâm kimesne meclis-i ma‘kūd-ı mezkûrda medîne-i mezbûra tâbi‘ Belgrad karyesinde mütemekkin işbu râfiʻü’s-sifr Nikola v. Panayot nâm zimmî muvâcehesinde ikrâr-ı tâm ve takrîr-i kelâm edip yedimde şirâen mülk ve hakkım olup karye-i mezbûrede vâki‘ bir tarafdan Maryora menzili ve bir tarafdan müşteri-yi mezbûr Nikola menzili ve bir tarafdan dere ve bir tarafdan tarîk-i âm ile mahdûd üç bâb fevkānî oda ve bir sofa ve altında üç kepenk bakkāl dükkânımı bi-cümleti’t-tevâbiʻ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile mesfûr Nikola zimmîye iki yüz elli guruşa beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki yüz elli guruşu mezbûr Nikola zimmî yedinden bi’t-tamam ahz u kabz eyledim, baʻde’l-yevm zikri mürûr eden menzil ve altında üç kepenk bakkāl dükkânı mesfûr Nikola zimmînin mülk-i müşterâsı ve hakk-ı sırfı olmuşdur, mutasarrıf olsun dedikde gıbbe’t-tasdîki’ş-şerʻî vâki‘ hâli mevlânâ-yı mezbûr mahallinde ketb [u] tahrîr ba‘de[hû] ba‘s olunan Çukadâr Ahmed ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Rebîʻülâhir sene tisʻa ve hamsîn ve mi’e ve elf, 1159. Şuhûdü’l-hâl: el-Hâc Mehmed Efendi el-İmâm bi-Câmi‘i Kebîr, Halil b. İbrahim, Ahmed Efendi [b.] Mustafa, Yunus Beşe [b.] Hüseyin, İbrahim [b.] Halil, Mehmed Çelebi [b.] Abdullah.