Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 339 Hüküm no: 277 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryora bt. Ostopan’nın Belgrad köyündeki bağını istiğlal yoluyla satması Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Şah Sultan Mahallesiʼnde sâkine Şerife Âişe bt. es-Seyyid Abdülkerim Efendi’nin menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde medîne-i mezbûre kazâsına tâbi‘ Belgrad karyesinde mütemekkine şahsı ta‘rîf-i şer‘î ile mu‘arrefe olan Maryora bt. Ostopan nâm Nasrâniye meclis-i ma‘kūd-ı mezkûrda işbu râfiʻatü’l-kitâb mezbûre Şerife Âişe mahzarında ikrâr-ı tâm ve takrîr-i kelâm edip yedimde mülküm olup karye-i mezbûre hudûdu dâhilinde vâki‘ bir tarafdan Nikola bağı ve bir tarafdan Lukaki bağı ve bir tarafdan Boyacı bağı ve bir tarafdan çayır ile mahdûd ber-vech-i tahmîn iki buçuk dönüm kürûmî mülk bağımı elli guruşu mukābelesinde mezbûre Şerife Âişe’ye bi-tarîkı’l-istiğlâl beyʻ ve teslîm eylediğimde ol dahi ber-vech-i muharrer iştirâ ve tesellüm ve kabz ve kabûl eylediğinden sonra semeni olan meblağ-ı mezbûr elli guruşu mezbûre Şerife Âişe yedinden ahz u kabz edip ba‘dehû mezbûre Şerife Âişe bağ-ı mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târîh-i kitâbdan bir sene tamamına değin yedi buçuk guruşa bana îcâr ve teslîm, ben dahi ber-vech-i muharrer istîcâr ve tesellüm ve kabûl ve kabz eyledim dedikde gıbbe’t-tasdîki’ş-şerʻî vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan Çukadâr Ahmed Ağa ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî min-Rebîʻülâhir sene tisʻa ve hamsîn ve mi’e ve elf. [Şuhûdü’l-hâl]: Eş-Şâhidûnü’s-sâbıkūn.