Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 339 Hüküm no: 278 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mustafa Beşe’nin vârislerinin kendilerine intikal eden bakkal dükkanı ve evdeki hisselerini satmaları Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Şah Sultan Mahallesiʼnde sâkin iken bundan akdem vefât eden el-Hâc Mustafa Beşe b. Ahmed’in hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun verâseti zevce-i menkûha-i metrûkesi Afife Hatun bt. el-Hâc Hasan ile zî-rahm cihetinden hâlesi oğlu Abdullah Beşe b. Süleyman’a münhasıra ve tashîh-i meseleleri dört sehmden i‘tibâr olunup sihâm-ı mezbûreden bir sehmi zevcesi mezbûre Afife Hatun’a ve bâkī üç sehmi hâlesi oğlu mezbûr Abdullah Beşe’ye isâbeti tahakkukundan sonra zâtı ta‘rîf-i şer‘î ile mu‘arrefe olan mezbûre Afife Hatun ile merkūm Abdullah Beşe meclis-i ma‘kūd-ı mezkûrda müteveffâ-i mezbûrun muʻtakı işbu râfiʻü’l-kitâb Osman Beşe b. Abdullah mahzarında herbiri bi’l-verâse ikrâr-ı tâm ve takrîr-i kelâm edip mûrisimiz müteveffâ-i mezbûrun ile’l-vefât yedinde mülkü ve hakkı idiği müsbet olup medîne-i mezbûre kazâsına tâbi‘ Belgrad nâm karyede vâki‘ bir tarafdan Maryora menzili ve bir tarafdan Nikola menzili ve bir tarafdan dere ve bir tarafdan tarîk-i âm ile mahdûd üç bâb fevkānî oda ve bir sofa ve altında üç kepenk bakkāl dükkânını tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile tashîh-i mezbûr üzere isâbet eden dört sehm hisse-i şâyiʻamızı cemî‘ tevâbiʻ ve levâhıkıyla iki yüz yirmi guruşa merkūm Osman Beşe’ye herbirimiz bi’l-verâse beyʻ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki yüz yirmi guruşu merkūm Osman Beşe yedinden herbirimiz bi’l-verâse bi-kadri’l-hısas bi’t-tamam ahz u kabz eyledik, baʻde’l-yevm zikr[i] mürûr eden menzil ve altında üç kepenk bakkāl dükkânı mezbûr Osman Beşe’nin mülk-i müşterâsı ve hakk-ı sırfı olup bizim katʻâ alâka ve medhalimiz kalmadı dedikde gıbbe’t-tasdîki’ş-şerʻî vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan Çukadâr Ahmed Ağa ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî min-Rebîʻülâhir li-sene tisʻa ve hamsîn ve mi’e ve elf, 1159. Şuhûdü’l-hâl: Eş-Şâhidûnü’s-sâbıkūn.