Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 340 Hüküm no: 279 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Beşe’nin kendisine intikal eden evdeki hissesini satması Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Şah Sultan Mahallesiʼnde sâkin iken bundan akdem vefât eden Bakkāl el-Hâc Mustafa Beşe b. Ahmed’in hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun verâseti zevce-i menkûha-i metrûkesi Afife Hatun bt. el-Hâc Hasan ile zî-rahm cihetinden hâlesi oğlu Abdullah Beşe b. Süleyman’a münhasıra ve tashîh-i meseleleri dört sehmden i‘tibâr olunup sihâm-ı mezbûreden bir sehmi zevcesi mezbûre Afife Hatun’a ve bâkī üç sehmi mezbûr Abdullah Beşe’ye isâbeti tahakkukundan sonra mezbûr Abdullah Beşe meclis-i ma‘kūd-ı mezkûrda işbu râfiʻatü’l-kitâb mezbûre Afife Hatun mahzarında bi’l-verâse ikrâr-ı tâm ve takrîr-i kelâm edip müteveffâ-i mezbûrun ile’l-vefât yedinde mülkü ve hakkı idiği müsbet olup mahalle-i mezbûrede vâki‘ bir tarafdan Sadiler Şeyhi es-Seyyid Abdurrahman Efendi menzili ve bir tarafdan cebel ve bir tarafdan mezbûre Afife Hatun tasarrufunda olan vakıf menzil ve bir tarafdan tarîk-i âm ile mahdûd iki bâb fevkānî oda ve altında ahır ve bir kenîf ve bir su kuyusu ve bir mikdâr bağçeyi muhtevî mülk menzilden tashîh-i mezbûr üzere bana isâbet eden üç sehm hisse-i şer‘iyyemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûre Afife Hatun’a yüz elli guruşa bi’l-verâse beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz elli guruşu bi’l-verâse mezbûre Afife Hatun yedinden bi’t-tamam ve’l-kemâl ahz u kabz eyledim, baʻde’l-yevm menzil-i mahdûd-ı mezkûrda olan tashîh-i merkūm üzere üç sehm hissem mezbûre Afife Hatun’un mülk-i müşterâsı ve hakk-ı sırfı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şerʻî vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan Çukadâr Ahmed Ağa ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî min-Rebîʻülâhir li-sene tisʻa ve hamsîn ve mi’e ve elf. Şuhûdü’l-hâl: Eş-Şâhidûnü’s-sâbıkūn.