Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 341 Hüküm no: 280 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal el-Hâc Mustafa Beşe’nin aralarındaki tereke anlaşmazlığında sulh olmaları Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Şah Sultan Mahallesiʼnde sâkin iken bundan akdem vefât eden Bakkāl el-Hâc Mustafa Beşe b. Ahmed’in hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun verâseti zevce-i menkûha-i metrûkesi Afife Hatun bt. el-Hâc Hasan ile zî-rahm cihetinden hâlesi oğlu Abdullah Beşe b. Süleyman’a münhasıra ve tashîh-i meseleleri dört sehmden i‘tibâr olunup sihâm-ı mezbûreden bir sehmi zevcesi mezbûre Afife Hatun’a ve bâkī üç sehmi mezbûr Abdullah Beşe’ye isâbeti tahakkukundan sonra mezbûr Abdullah Beşe meclis-i ma‘kūd-ı mezkûrda müteveffâ-i mezbûrun zevcesi ve terekesine bi’l-verâse vâzıʻatü’l-yed olan işbu râfiʻatü’l-kitâb mezbûre [Afife Hatun] el-Hâc Mustafa Beşe’nin terekesinden mecmû‘u iki yüz guruş kıymetli iki kandayî? yorgan ve sekiz beledî yasdık ve dört minder ve iki beledî döşek ve bir orta keçesi ve gömlek bez ve on sahan ve beş tencere ve iki tas ve üç yorgan ve bir pandül sâʻat ve bir arka şalı ve altı cedîd destâr ve üç top alaca ve on fağfûr fincan ve iki sim zarf ve bir inci kuşak ve bir uçkurluk ve yağlıklık bezler ile yüz guruş nakid akçesini mezbûre Afife Hatun ketm ve ihtifâ eyledi deyü da‘vâya tasaddî eylediğimde ol dahi ber-vech-i muharrer bi’l-külliye inkâr edip bu vechile beynimizde münâzaʻât-ı kesîre ve muhâsamât-ı şedîde vâkıʻa olmuş idi. El-hâletü hâzihî muslihûn tavassut edip mezbûre Afife Hatun ile beni an-inkâr yirmi iki guruş üzerine musâlaha eylediklerinde ben dahi sulh-ı mezbûru baʻde’l-kabûl ve bedel-i sulh olan meblağ-ı mezbûr yirmi iki guruşu mezbûre Afife Hatun yedinden bi’t-tamam ahz u kabz edip husûs-ı mezkûra müte‘allika mîrâs da‘vâsından mezbûre Afife Hatun’un zimmetini bi’l-verâse ibrâ ve ıskāt eyledim dedikde gıbbe’t-tasdîki’ş-şerʻî vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan Çukadâr Ahmed Ağa ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî min-Rebîʻülâhir sene tisʻa ve hamsîn ve mi’e ve elf. Şuhûdü’l-hâl: Eş-Şâhidûnü’s-sâbıkūn.