Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 342 Hüküm no: 281 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed’in vefâtıyla oğluna intikal eden Kametî Evkafı’na ait evin başkasına ferağına izin verilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Düğmeciler Mahallesiʼnde sâkin iken bundan akdem vefât eden Mehter el-Hâc Mehmed b. Ahmed’in sulbî sagīr oğlu İbrahim’in vâlidesi ve tesviye-i umûruna kıbel-i şer‘den bâ-hüccet-i şer‘iyye mansûb vasiyyesi olup zâtı ta‘rîf-i şer‘î ile mu‘arrefe olan işbu râfiʻatü’l-kitâb Hanife Hatun bt. Abdullah meclis-i şer‘-i enverde takrîr-i kelâm ve tâʻbir ani’l-merâm edip Kāmetî Evkāfı’ndan icâreteyn-i ma‘lûmeteyn ile nısf hisse müteveffâ-i mezbûrun ile’l-vefât taht-ı tasarrufunda olup ba‘de vefâtihi vasiyyesi olduğum sulbî sagīr oğlu mezbûr İbrahim ile sulbiye sagīre kızı Fâtıma’ya intikāl-ı [73b] âdî ile intikāl edip mahalle-i mezbûrede vâki‘ bir tarafdan Halil Çelebi menzili ve bir tarafdan Safiye Hanım menzili ve bir tarafdan odalar ve bir tarafdan tarîk-i âm ile mahdûd büyût-ı adîdeyi muhtevî nısf menzilden vasiyyesi olduğum sagīr-i mezbûr İbrahim’in hissesi ifrâz mümkün olmadığından mâ‘adâ hâsıl harcına vefâ etmeyip nafaka ve kisveye dahi eşedd-i ihtiyâcı olmağla ber-vech-i muharrer sagīr-i mezbûrun İbrahim’in hissesi sûk-ı sultânîde baʻde’l-müzâyede ve inkıtâʻi’r-rağbe bedel-i misli ve ma‘rifet-i mütevellî ile âhara ferağ ve bedeli istirbâh olunmak sagīr-i mezbûr hakkında her vechile enfa‘ ve evlâ olmağla hisse-i mezkûru âhara ferağ[a] kıbel-i şer‘den izin verilmek matlûbumdur dedikde vasiyye-i mezbûrenin kelimât-ı meşrûhası vâkıʻa mutâbıka idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûr İbrahim’in menzil-i mezkûrda olan hissesini sûk-ı sultânîde baʻde’l-müzâyede ve inkıtâʻi’r-rağbe bedel-i misli ve ma‘rifet-i mütevellî ile âhara ferağ ve bedeli istirbâh olunmak üzere vasiyye-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’r-râbiʻ ve’l-ışrîn min-Rebîʻülâhir li-sene tisʻa ve hamsîn ve mi’e ve elf, 1159. Şuhûdü’l-hâl: Ahmed Ağa [b.] Mustafa, Süleyman [b.] Ahmed, Halil [b.] İbrahim, Ahmed Ağa [b.] Hamdi Mehmed, es-Seyyid Mehmed [b.] es-Seyyid Mustafa, Ahmed Efendi [b.] Mustafa.