Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 343 Hüküm no: 282 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed’in terekesinden küçük oğluna nafaka tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Düğmeciler Mahallesiʼnde sâkin iken bundan akdem vefât eden Mehter el-Hâc Mehmed b. Ahmed’in sulbî sagīr oğlu İbrahim’in vâlidesi ve tesviye-i umûruna bâ-hüccet-i şer‘iyye mansûbe vasiyyesi olup zâtı ta‘rîf-i şer‘î ile mu‘arrefe olan işbu râfiʻatü’l-kitâb Hanife Hatun bt. Abdullah meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasiyyesi olduğum sagīr-i mezbûrun nafaka ve kisveye eşedd-i ihtiyâcı olmağla babası müteveffâ-i mezbûrdan müntakil mâlından kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyye-i mezbûrenin kelimât-ı meşrûhası vâkıʻa mutâbıka edicek, zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûr İbrahim’e babası müteveffâ-i mezbûrdan müntakil mâlından beher yevm sekiz akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve-bahâsına harc u sarfa ve lede’l-iktizâ istidâneye ve inde’z-zafer mâlından rücû‘a vasiyye-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’t-tâsiʻ min-Rebîʻülâhir sene tisʻa ve hamsîn ve mi’e ve elf, 1159. Şuhûdü’l-hâl: Ahmed Efendi [b.] Mustafa, es-Seyyid Ahmed [b.] es-Seyyid Mehmed, es-Seyyid Mehmed [b.] es-Seyyid Mustafa, Halil Çelebi [b.] İbrahim, Hüseyin [b.] Mehmed.