Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 344 Hüküm no: 283 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karcıbaşızâde el-Hâc Mustafa’nın hayattayken Mehmed Ağa’yı vasi tayin etmiş olduğu Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Karcıbaşızâde demekle ma‘rûf el-Hâc Mustafa b. Osman’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde mahmiye-i İstanbul’da Ereğli Mahallesiʼnde sâkin olup müteveffâ-i mezbûrun ber-vech-i âtî vasiyy-i muhtârı olduğunu iddiʻâ eden işbu râfiʻü’l-kitâb akrabâsından Mehmed Ağa b. el-Hâc İbrahim Efendi meclis-i ma‘kūd-ı mezkûrda müteveffâ-i mezbûrun zevce-i menkûha-i metrûkeleri ve tereke-i müteveffâ-i mezbûra bi’l-verâse vâzıʻatü’l-yed olan zâtları zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fethi Hatun bt. Abdullah ve Zeyneb Hatun bt. Mehmed mahzarlarında üzerlerine da‘vâ ve takrîr-i kelâm edip müteveffâ-i mezbûr el-Hâc Mustafa b. Osman b. Abdullah hâl-i marazında fevtinden beş gün mukaddem ben bi-emri’llâhi te‘âlâ vefât eylediğimde mecmû‘-ı terekem ve zimem-i nâsda olan [75a] [devamı 75a’dadır.] hukūkum ahz u kabz olunup sünnet-i seniyye üzere techîz ve tekfînim ve ıskāt-ı salât-ı fâʼitem ve eyyâm-ı mu‘tâde tabh-ı taʻâm ve itʻâm-ı fukarâ oluna ve işbu sulbî sagīr oğlum Mehmed Emin ile sulbiye sagīre kızım Hadice’nin vakt-i rüşd ü sedâdına varınca tesviye-i emirlerine huzûr-ı Müslimîn’de beni vasiyy-i muhtâr nasb u ta‘yîn eylediğinde ben dahi ber-vech-i muharrer vesâyet-i mezbûreyi muvâcehesinde baʻde’l-kabûl mezbûr el-Hâc Mustafa musırran alâ-îsâʼihî fevt olmağla tenfîz-i vesâyâ murâd ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahmiye-i mezbûrede Hâcehatun Mahallesiʼnde sâkin Çelebi b. Mustafa ve Mehmed Odabaşı b. Ömer nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mezbûr el-Hâc Mustafa b. Osman b. Abdullah hâl-i marazında fevtinden beş gün mukaddem ben bi-emri’llâhi te‘âlâ vefât eylediğimde mecmû‘-ı terekem ve zimem-i nâsda olan hukūkum ahz u kabz olunup sünnet-i seniyye üzere techîz ve tekfînim ve ıskāt-ı salât-ı fâʼitem ve eyyâm-ı mu‘tâde tabh-ı taʻâm ve itʻâm-ı fukarâ oluna ve işbu sulbî sagīr oğlum Mehmed Emin ile sulbiye sagīre kızım Hadice’nin vakt-i rüşd ü sedâdına varınca tesviye-i emirlerine işbu müdde‘î-i mezbûr Mehmed Ağa’yı bizim huzûrumuzda vasiyy-i muhtâr nasb u ta‘yîn eylediğinde ol dahi ber-vech-i muharrer vesâyet-i mezbûreyi muvâcehesinde baʻde’l-kabûl mezbûr el-Hâc Mustafa musırran alâ-îsâʼihî vefât eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr, ba‘de[hû] ma‘an ba‘s olunan ümenâ-i şer‘den Çukadâr Ahmed Ağa ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin hükm-i mezbûr tenfîz olunmağın mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min-Rebîʻi’l-evvel sene tisʻa ve hamsîn ve mi’e ve elf, 1159. Şuhûdü’l-hâl: el-Hâc Mehmed Efendi el-İmâm bi-Câmi‘i Kebîr, Ebûbekir Çelebi [b.] Süleyman, Osman Efendi b. Halil, el-Hâc Mehmed [b.] Mustafa Efendi, Derviş Mehmed b. Osman Efendi.