Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 345 Hüküm no: 284 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avadik v. Toros’un vârislerinden olan oğlunun intikal eden ev hissesini satması Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de İslambey Mahallesi’nde mütemekkin iken bundan akdem hâlik olan Avadik v. Toros nâm Ermeninin sulbî kebîr oğlu Mardiros nâm Ermeni meclis-i şer‘-i şerîf-i enverde hâlik-i mezbûrun zevcesi ve mesfûr Mardiros nâm Ermeninin üveyi anası işbu râfiʻatü’s-sifr Anna bt. Avadik nâm Ermeniye muvâcehesinde ikrâr-ı tâm ve takrîr-i kelâm edip merhûm Çavuşbaşı Ali Ağa Vakfı’ndan mahalle-i mezbûrede vâki‘ kefere odalarında vâki‘ ma‘lûmü’l-hudûd vakıf menzilden nısf hissesi bi’l-(…) hâlik-i mesfûrun ile’l-helâk taht-ı tasarrufunda olup ba‘de helâkihî intikāl-ı âdî üzere bana ve karındaşım Takor nâm Ermeniye ale’s-seviyye intikāl tahakkukundan sonra bana intikāl eden hissemin mecmû‘-ı menzilden rub‘ olan hisse-i mezkûremi yüz on guruş bedel mukābelesinde bâ-ma‘rifet-i mütevellî mezbûrun nısf-ı âharına mutasarrıfe olan üveyi vâlidem mesfûre Anna Ermeniye bâ-ma‘rifet-i mütevellî ferağ ve tefvîz ve bedel-i ferağı yedinden ahz u kabz eylediğimden sonra ve bundan akdem hâlike olan anam Nazlı bt. Mardiros’un tereke-i menkūlesinden olmak üzere yirmi beş miskāl altın (…) ve sekiz miskāl altın gerdâniye ve yetmiş guruş kıymetli üç ayaklı altın küpe ve bir kırmızı çuka ferâce ve bir telli (…) isâbet eden hisse-i irsiyyem için tasaddî eylediğim da‘vâ-yı mezkûremden fâriğa olup menzil-i mezkûr ile anam hâlike ve babam hâlik-i mesfûrun terekelerinden kalîl ü kesîr terekeleri ve bi’l-cümle hukūk-ı mîrâsa müte‘allika âmme-i mîrâs da‘vâ[sından] üveyi vâlidem mesfûre Anna nâm Ermeniyenin zimmetini ibrâ-i âmm-ı kātıʻu’n-nizâ‘la ibrâ ve ıskāt eyledim, vechen mine’l-[vücûh] ve sebeben mine’l-esbâb katʻâ da‘vâ ve nizâ‘ım yokdur dedikde gıbbe’t-tasdîki’ş-şerʻî mâ-vaka‘a bi’t-taleb ketb olundu. Fi’l-yevmi’r-râbiʻ aşer min-şehri Cemâziyelevvel sene tisʻa ve hamsîn ve mi’e ve elf. Şuhûdü’l-hâl: Mustafa Ağa b. Yusuf, Bostanî Ali b. Ahmed, Bostanî Abdullah b. Abdulkādir, es-Seyyid Mehmed b. es-Seyyid Mustafa, es-Seyyid Ahmed (…).