Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 356 Hüküm no: 297 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karcıbaşızâde el-Hâc Mustafa’nın vârislerinin, terekeden çıkan karkuyusundaki karı Serhassa Buzcubaşısı Ali Ağa ile kardeşi Ahmed Ağa’ya satmaları Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Karcıbaşızâde demekle ma‘rûf el-Hâc Mustafa b. Osman’ın verâseti zevce-i menkûha-i metrûkeleri Zeyneb Hatun bt. Mehmed ve Fethi Hatun bt. Abdullah ile sulbî sagīr oğlu Mehmed Emin ile sulbiye sagīre kızı Hadice’ye münhasıra olduğu şer‘an zâhir ve müteʻayyen oldukdan sonra sagīrân-ı mezbûrânın tesviye-i emirlerine bâ-hüccet-i şer‘iyye vasiyy-i muhtârları olan Mehmed Ağa b. İbrahim Efendi ile zâtları zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan mezbûretân Zeyneb Hatun ve Fethi Hatun meclis-i şer‘-i şerîf-i enverde hâlâ Ser-hâssa buzcubaşısı olan işbu kitâb-ı sıhhat-nisâbın sâhibi fahrü’l-akrân Ali Ağa ve karındaşı Mehmed Ağa b. Ahmed mahzarlarında herbiri bi’l-verâse ve bi’l-vesâye ikrâr-ı tâm ve takrîr-i kelâm [78a] edip müteveffâ-i mezbûrun medîne-i mezbûrede kendi ameliyle hâsıl ve kar biʼri demekle ma‘rûf biʼrin derûnuna cem‘ eylediği karı karcılar beynlerinde beyʻ olunması müteʻârif olmağla kar-ı mezkûru karcılar beynlerinde müddet-i medîd müzâyede olunup ragabât-ı nâs bi’l-külliye münkatıʻa oldukdan sonra mûmâ-ileyhimâ Ali Ağa ve karındaşı Mehmed Ağa üzerlerinde bin beş yüz guruşda karâr edip ziyâde ile tâlib-i âharı zuhûr etmeyip ve meblağ-ı mezbûr karcı hırfeti beynlerinde semen-i misli olduğunu haber verdiklerinden sonra tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile semen-i misli olan meblağ-ı mezbûr bin beş yüz guruşa herbirimiz bi’l-verâse ve bi’l-vesâye mûmâ-ileyhimâ Ali Ağa ve karındaşı Mehmed Ağa’ya ale’l-iştirâki’s-seviyye beyʻ ve temlîk ve mahallinde kendülere teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl ve kabz eylediklerinden sonra semen-i misli olan meblağ-ı mezbûr bin beş yüz guruşu mûmâ-ileyhimâ Ali Ağa ve karındaşı Mehmed Ağa yedlerinden herbirimiz bi’l-verâse ve bi’l-vesâye bi-kadri’l-hısas bi’t-tamam ahz u kabz eyledik, baʻde’l-yevm müteveffâ-i mezbûrun ameliyle hâsıl eylediği zikr olunan biʼrin derûnunda mevcûd olan kar mûmâ-ileyhimâ Ali Ağa ve karındaşı Mehmed Ağa’nın ale’l-iştirâki’s-seviyy mülk-i müşterâları ve hakk-ı sırfları olmuşdur, keyfe mâ yeşâʼan ve yahtârân mutasarrıfân olsunlar dediklerinden sonra mûmâ-ileyhimâ Ali Ağa ve karındaşı Mehmed Ağa meclis-i mezkûrda müteveffâ-i mezbûrun ameliyle hâsıl eylediği sâlifü’z-zikr biʼrin derûnunda mevcûd olan kar için verdiğimiz meblağ-ı mezbûr bin beş yüz guruş mütâlebesinden mezbûretân Zeyneb ve Fethi nâm hatunlar ile vasiyy-i mezbûr Mehmed Ağa’nın ve sagīrân-ı mezbûrân Mehmed Emin’in ve Hadice’nin zimmetlerini ibrâ ve ıskāt eyledik dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbiʻ min-Cemâziyelevvel sene tisʻa ve hamsîn ve mi’e ve elf. Şuhûdü’l-hâl: el-Hâc Mehmed Efendi b. Mustafa el-İmâm bi-Câmi‘i Kebîr, Ebûbekir Çelebi b. Yakub, Ali Çelebi b. Ebûbekir, Mehmed Odabaşı, Naʻlbend Ali Beşe b. Hasan, Alemdâr Ali Ağa b. İbrahim.