Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 358 Hüküm no: 299 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zaim el-Hâc İsmail Ağa’nın vefâtıyla yeğeni Abdullah’a annesinin vasi tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Takyecibaşı Mahallesi ahâlîsinden iken bu sene-i mübâreke[de] tarîk-i hacc-ı şerîfde vefât eden Zaʻîm el-Hâc İsmail Ağa b. Mehmed’in li-ebeveyn karındaşı oğlu Abdullah nâm sagīrin tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûfe ve diyânet ile mevsûfe her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīr-i mezbûrun vâlidesi bâʻisetü’l-kitâb Emetullah Hatun bt. Abdullah’ı hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûrun tesviye-i umûruna vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesini kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Rebîʻülâhir li-sene tisʻa ve hamsîn ve mi’e ve elf. Şuhûdü’l-hâl: el-Hâc Ahmed Ağa b. ( ), Hüseyin Beşe b. Ahmed, Mehmed Efendi b. Ahmed, Ahmed Efendi b. Mustafa, Muhzırbaşı Mehmed.