Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 368 Hüküm no: 308 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep Hatun ile Fethi Hatun’un kocaları Karcıbaşızâde el-Hâc Mustafa’dan miras kalan çiftlik ve içindeki alet, eşya ve hayvanlardaki hisselerini satmaları Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Karcıbaşızâde demekle ma‘rûf el-Hâc Mustafa b. Osman’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun verâseti zevce-i menkûha-i metrûkeleri Zeyneb Hatun bt. Mehmed ve Fethi Hatun bt. Abdullah ile sulbî sagīr oğlu Mehmed Emin ve sulbiye sagīre kızı Hadice’ye ve tashîh-i meseleleri kırk sekiz sehmden i‘tibâr olunup sihâm-ı mezbûreden üçer sehmi zevcesi mezbûretân Zeyneb ve Fethi nâm hatunlardan herbirilerine ve yirmi sekiz sehmi sagīr-i mezbûr Mehmed Emin’e ve on dört sehmi sagīre-i mezbûre Hadice’ye isâbeti tahakkukundan sonra zâtları ta‘rîf-i şer‘î ile mu‘arrefe olan mezbûretân Zeyneb ve Fethi nâm hatunlar meclis-i ma‘kūd-ı mezkûrda işbu râfiʻü’l-kitâb Mehmed Ağa b. İbrahim Efendi mahzarında herbiri bi’l-verâse ikrâr-ı tâm ve takrîr-i kelâm edip zevcimiz müteveffâ-i mezbûrun ile’l-vefât yedinde mülk ve hakkı olup Havâss-ı Refîʻa kazâsı muzâfâtından Çekmece-i Sagīr nâhiyesine tâbi‘ Alibey karyesinde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât çiftlik ve çiftlik-i mezkûr derûnunda mevcûd olan mecmû‘-ı hayvanât ve mezrû‘ alef ve hınta ve şa‘îr ve bârgirler ve sâir çiftlik âlâtından tashîh-i mezkûr üzere bize isâbet eden altı sehm hisse-i irsiyyemizi cemî‘ tevâbiʻ ve levâhıkıyla tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç yüz on guruşa mezbûr Mehmed Ağa’ya herbirimiz bi’l-verâse beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr üç yüz on guruşu merkūm Mehmed Ağa yedinden herbirimiz bi’l-verâse bi-kadri’l-hısas bi’t-tamam ahz u kabz eyledik, baʻde’l-yevm çiftlik-i mezkûrda olan altı sehm hissemizde ve kezâlik çiftlik-i mezkûr derûnunda mevcûd olan mecmû‘-ı hayvanât ve mezrû‘ alef ve hınta ve şa‘îr ve bârgirler ve sâir çiftlik âlâtından tashîh-i merkūm üzere altı sehm hissemizde bizim katʻâ alâka ve medhalimiz kalmayıp merkūm Mehmed Ağa’nın mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dediklerinde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr ba‘dehû ma‘an ba‘s olunan ümenâ-i şer‘den Çukadâr Ahmed Ağa b. Hamdi Mehmed ve Muhzır es-Seyyid Mehmed b. es-Seyyid Mustafa ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Rebîʻülâhir sene 1159. Şuhûdü’l-hâl: el-Hâc Mehmed Efendi el-İmâm bi-Câmi‘i Kebîr, Ebûbekir Beşe [b.] Mustafa, Monlâ Osman b. Odabaşı el-Hâc Mehmed, Halil [b.] İbrahim, Halil Efendi el-Mukayyid, Osman Ağa b. el-Hâc Mustafa, Mehmed Çelebi b. Abdullah.