Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 369 Hüküm no: 309 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcu terekesinden fazla olarak vefât eden Ali Ağa’nın yarısına sahip olduğu çiftliğin, hanımı Ayşe Hatun’un mehir alacağı ile takas edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Cezerî Kasım Paşa Mahallesiʼnde sâkin iken bundan akdem vefât eden Ali Ağa b. Mehmed’in düyûnu terekesinden ezyed olmağla vereseleri terekesini kabza rağbet etmeyip düyûn-ı müsbetesini edâya kıbel-i şer‘den vasî ve kayyım nasb olunan es-Seyyid Mehmed Ağa b. es-Seyyid Mustafa meclis-i şer‘-i şerîf-i enverde müteveffâ-i mezbûrun zevcesi işbu râfiʻatü’l-kitâb Âişe Hatun bt. Osman mahzarında bi’l-vesâye ikrâr-ı tâm ve takrîr-i kelâm edip Havâss-ı Refîʻa kazâsına tâbi‘ Kiteli nâm karyede vâki‘ etrâf-ı erba‘ası tarîk-i âm ile mahdûd hâriciyyesinde bir bâb tahtânî oda ve kenîf ve ahır ve sundurma ve bir anbar ve bir su kuyusu ve harman yeri ve dâhiliyesinde iki bâb fevkānî oda ve iki sofa ve mâ-i cârî ve fevkānî bir matbah ve dehlîz ve gasilhâne ve bir tahtânî oda ve bir ahır ve kenîf ve kilâr odası ve zât-ı eşcâr-ı müsmire ve gayr-ı müsmireyi muhtevî çiftlik tâʻbir olunur mülk menzilin nısfı zevcesi mezbûre Âişe Hatun’un ve nısf-ı âharı müteveffâ-i mezbûrun ile’l-vefât yedinde mülk olup müteveffâ-i mezbûrun düyûn-ı müsbetesini edâ için nısf çiftlik-i mahdûd-ı mezkûru tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile üç yüz yirmi guruşa mezbûr Âişe Hatun’a bi’l-vesâye beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr üç yüz yirmi guruş mezbûre Âişe Hatun zevci müteveffâ-i mezbûr zimmetinde mütekarrer ve ma‘kūdün-aleyh üç yüz guruş mehr-i müeccel hakkı olduğu müsbet olmağla meblağ-ı mezbûr üç yüz yirmi guruşdan mezbûre Âişe Hatun’un zevci müteveffâ-i mezbûr zimmetinde olan üç yüz guruş mehr-i müeccel hakkına takās ol dahi ber-vech-i muharrer mukāssa ve kabûl edip bâkī yirmi guruş mezbûre Âişe Hatun yedinden bi’l-vesâye ahz u kabz eyledim, baʻde’l-yevm nısf çiftlik-i mahdûd-ı mezkûr mezbûre Âişe Hatun’un mülk-i müşterâsı ve hakk-ı sırfı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Cemâziyelevvel sene 1159. Şuhûdü’l-hâl: Abdullah Efendi b. Mehmed Efendi, es-Seyyid Halil Ağa [b.] el-Hâc Mustafa, Osman Efendi Müezzin, Halil [b.] İbrahim, Mollâ İsmail Vekîl-i Müezzin-i Kasım Paşa.