Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 370 Hüküm no: 310 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karcıbaşızâde el-Hâc Mustafa’dan küçük çocuklarına intikal eden çiftlikteki hisselerinin satılması için vasileri Mehmed Ağa’ya izin verilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Karcıbaşızâde demekle ma‘rûf el-Hâc Mustafa Ağa b. Osman’ın sulbî sagīr oğlu Mehmed Emin ile sulbiye sagīre kızı Hadice’nin tesviye-i emirlerine bâ-hüccet-i şer‘iyye vasiyy-i muhtârı olan işbu râfiʻü’l-kitâb Mehmed Ağa b. İbrahim Efendi meclis-i şer‘-i şerîf-i enverde takrîr-i kelâm ve tâʻbir ani’l-merâm edip Havâss-ı Refîʻa kazâsı muzâfâtından Çekmece-i Sagīr nâhiyesine tâbi‘ Alibey nâm karyede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât mülk çiftliğinden sülüsân hissesi müteveffâ-i mezbûrun ile’l-vefât yedinde mülk olmağla çiftlik-i mezkûrda olan sülüs hissenin hissedârı âhara beyʻ murâd eylediğinde sülüsân hissede sagīrân-ı mezbûrânın hisseleri ifrâz mümkün olmayıp harâba müşrif olup ve hâsılı harcına vefâ etmeyip ta‘mîr ve termîm olunmak lâzım geldikde sagīrân-ı mezbûrânın mâllarında noksan terettüb etmek emr-i muhakkak olmağın hissedârın hissesinde sülüsân hissede olan sagīrân-ı mezbûrânın hisseleri ma‘an sûk-ı sultânîde baʻde’l-müzâyede ve inkıtâʻi’r-rağbe âhara beyʻ ve semeni istirbâh olunmak sagīrân-ı mezbûrân haklarında her vechile enfa‘ ve evlâ olmağla âhara beyʻa kıbel-i şer‘den izin verilmek matlûbumdur dedikde vasiyy-i mezbûrun [74a] kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri ber-vech-i muharrer çiftlik-i mezkûrda olan sülüs hissenin hissidârı ile sülüsân hissede sagīrân-ı mezbûrânın hisseleri sûk-ı sultânîde baʻde’l-müzâyede ve inkıtâʻi’r-rağbe semen-i misliyle âhara beyʻ ve semeni istirbâh olunmak üzere vasiyy-i mezbûra izin verilmeğin mâ-vaka‘a bi’t-taleb ketb olundu. Fi’l-yevmi’l-hâmis min-Cemâziyelevvel li-sene tisʻa ve hamsîn ve mi’e ve elf. Şuhûdü’l-hâl: Hatîb el-Hâc Mehmed Efendi b. Mustafa Efendi, Mehmed Ustabaşı b. Veli, es-Seyyid Ali Usta Ağa b. ( ), Ebûbekir Ağa b. ( ), es-Seyyid Mehmed b. es-Seyyid Mustafa, Halil Çelebi b. İbrahim.