Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 371 Hüküm no: 311 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’den küçük kızına intikal eden evdeki hissesinin satılmasına izin verilmesi Havâss-ı Refîʻa kazâsına tâbi‘ Pirinççi karyesinde sâkin iken bundan akdem vefât eden Mehmed Beşe b. Mustafa’nın sulbiye sagīre kızı Saime’nin ammizâdesi ve tesviye-i umûruna bâ-hüccet-i şer‘iyye mansûb vasîsi olan işbu râfiʻü’l-kitâb Salih Beşe b. Ali meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasîsi olduğum sagīre-i mezbûrenin babası müteveffâ-i mezbûrun ile’l-vefât yedinde mülk ve hakkı olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât mülk menzilden isâbet eden hisselerini verese-i kibâr âhara beyʻ murâd eylediklerinde sagīre-i mezbûrenin hissesi ifrâz mümkin olmayıp hâsıl harcına vefâ etmediğinden mâ‘adâ nafaka ve kisveye dahi eşedd-i ihtiyâcı olmağla verese-i kibârın hissesiyle sagīre-i mezbûrenin hissesi ma‘an âhara beyʻ ve semen istirbâh olunmak sagīre-i mezbûre hakkında her vechile enfa‘ ve evlâ olmağla kıbel-i şer‘den izin verilmek matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri menzil-i mahdûd-ı mezkûrda olan verese-i kibârın hissesiyle sagīre-i mezbûrenin hissesi ma‘an âhara beyʻ ve semen istirbâh olunmak üzere vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Cemâziyelevvel sene tisʻa ve hamsîn ve mi’e ve elf, 1159. Şuhûdü’l-hâl: Eş-Şâhidûnü’s-sâbıkūn.