Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 371 Hüküm no: 312 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun’un evini Şeyhülkurrâ Nukud Vakfı’na istiğlal yoluyla satması Havâss-ı Refîʻa kazâsına tâbi‘ Alibey karyesinde sâkine ve zâtı ta‘rîf-i şer‘î ile mu‘arrefe olan Ümmühani Hatun bt. Mehmed meclis-i şer‘-i şerîf-i enverde bundan akdem vefât eden el-Hâc Mustafa b. Ahmed’in Câmi‘-i Kebîr’de vaz‘ eylediği Şeyhülkurrâ’ya mevkūfe nukūdun ber-vech-i meşrûta mütevellîsi olan işbu râfiʻü’l-kitâb Hatîb el-Hâc Mehmed Efendi b. Mustafa Efendi mahzarında ikrâr-ı tâm ve takrîr-i kelâm edip yedimde mülküm olup karye-i mezbûrede vâki‘ bir tarafdan Karabıyıkoğlu menzili ve bir tarafdan Halil menzili ve bir tarafdan Ömer menzilleri ile mahdûd tahtânî iki bâb oda ve bir sofa ve ahır ve müşterek biʼr-i mâyı müştemil mülk menzilimi yüz otuz üç guruşa mütevellî-i mûmâ-ileyh el-Hâc Mehmed Efendi’ye bi-tarîkı’l-istiğlâl beyʻ ve teslîm eylediğimde ol dahi ber-vech-i muharrer mâl-ı vakf-ı mezbûr ile iştirâ ve tesellüm ve kabûl edip meblağ-ı mezbûr [yüz] otuz üç guruşu mütevellî-i mûmâ-ileyh el-Hâc Mehmed Efendi yedinden bi’t-tamam ahz u kabz eylediğimden sonra mütevellî-i mûmâ-ileyh menzil-i mahdûd-ı mezkûra ba‘de’t-tahliyyeti’ş-şer‘iyye ve’t-tekābuzi’l-mer‘î târîh-i kitâbdan beher senesi yirmişer guruşdan üç sene tamamına değin altmış guruşa bana îcâr ve teslîm, ben dahi ber-vech-i muharrer istîcâr ve tesellüm ve kabûl ve kabz eyledim dedikden sonra mukırre-i mezbûre Ümmühani Hatun’un oğlu Mustafa b. Ahmed meclis-i mezbûrda mütevellî-i vakf-ı mezbûr muvâcehesinde takrîr-i kelâm ve tâʻbir ani’l-merâm edip derk-i menzile ve asl-ı mâl meblağ-ı mezbûra ve ücret-i menzile tarafeynden bi’l-emr ve’l-kabûl kefâlet-i sahîha-i şer‘iyye ile kefîl ve zâmin oldum dedikden sonra mukırre-i mezbûre Ümmühani Hatun meclis-i mezbûrda iâde-i kelâm edip ecel-i mezkûr hulûlünde asl-ı deyn-i mezbûra ve ücret-i müctemiʻayı edâ müyesser olmaz ise menzil-i mahdûd-ı mezkûru semen-i âhara beyʻ ve kabz-ı semen ve semen-i mezkûrdan edâ-yı deyn olunup fazlayı bana îsâle ve kabz [ve] îsâl ve mütevakkıf olduğu umûrun küllîsine azl ve inʻizâlden masûne vekâlet-i devriye ile işbu hâzır bi’l-meclis Ahmed Ağa b. ( ) nâm kimesneyi tarafımdan vekîl-i nâib-i menâb nasb u ta‘yîn eylediğimde ol dahi ber-vech-i muharrer vekâlet-i mezbûreyi baʻde’l-kabûl ve hizmet-i lâzımesin kemâ-yenbagī edâya taʻahhüd ve iltizâm eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî min-Cemâziyelevel sene tisʻa ve hamsîn ve mi’e ve elf. Şuhûdü’l-hâl: Mollâ Osman [b.] Abdullah, Osman Efendi el-İmâm der-karye, Ali Beşe [b.] Hüseyin, Ahmed Ağa [b.] Ali, Mehmed Beşe [b.] Ahmed, Halil [b.] İbrahim.