Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 372 Hüküm no: 313 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed’den küçük kızına intikal eden Kametî Vakfı’na ait evin başkasına ferağına izin verilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Düğmeciler Mahallesiʼnde sâkin iken bundan akdem vefât eden Mehter el-Hâc Mehmed b. Ahmed’in sulbiye sagīre kızı Fâtıma’nın vâlidesi ve tesviye-i umûruna vasiyyesi olup zâtı ta‘rîf-i şer‘î ile mu‘arrefe olan işbu râfiʻatü’l-kitâb Âişe Hatun bt. Halil meclis-i şer‘-i şerîf-i enverde takrîr-i kelâm ve tâʻbir ani’l-merâm edip Kāmetî Evkāfı’ndan icâreteyn-i ma‘lûmeteyn ile nısf hisse müteveffâ-i mezbûrun ile’l-vefât taht-ı tasarrufunda olup ba‘de vefâtihi vasiyyesi olduğum sulbiye sagīre kızı mezbûre Fâtıma ile sulbî sagīr oğlu İbrahim’e intikāl-ı âdî ile intikāl edip mahalle-i mezbûrede vâki‘ bir tarafdan Halil Çelebi menzili ve bir tarafdan Safiye Hanım menzili ve bir tarafdan odalar ve bir tarafdan tarîk-i âm ile mahdûd büyût-ı adîdeyi muhtevî nısf menzilden vasiyyesi olduğum sagīre-i mezbûre Fâtıma’nın hissesi ifrâz mümkün olmadığından mâ‘adâ hâsıl harcına vefâ etmeyip nafaka ve kisveye dahi eşedd-i ihtiyâcı olmağla ber-vech-i muharrer sagīre-i mezbûrenin hissesi sûk-ı sultânîde baʻde’l-müzâyede ve inkıtâʻi’r-rağbe bedel-i misli ve ma‘rifet-i mütevellî ile âhara ferağ ve bedel istirbâh olunmak sagīre-i mezbûre hakkında her vechile enfa‘ ve evlâ olmağla hisse-i mezkûru âhara ferâg[a] kıbel-i şer‘den izin verilmek matlûbumdur dedikde vasiyye-i mezbûrenin kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûre Fâtıma’nın menzil-i mezkûrda olan hissesini sûk-ı sultânîde baʻde’l-müzâyede ve inkıtâʻi’r-rağbe bedel-i misli ve ma‘rifet-i mütevellî ile âhara ferağ ve bedel istirbâh olunmak üzere vasiyye-i mezbûra izin vermeğin mâ-vaka‘a bi’t-taleb ketb olundu. Fî-selhi min-Cemâziyelevvel sene tisʻa ve hamsîn ve mi’e ve elf, 1159. Şuhûdü’l-hâl: Ahmed Ağa, İsmail Ağa [b.] Mehmed, Halil Çelebi [b.] İbrahim, Abdullah Ağa [b.] Mehmed, Mustafa b. Ahmed, el-Hâc Yusuf.