Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 379 Hüküm no: 322 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın vefât eden Karcıbaşızâde el-Hâc Mustafa Ağa’daki alacağını terekesinden talebi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Karcıbaşızâde el-Hâc Mustafa Ağa b. Osman’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde mahmiye-i İstanbul’da ( ) Mahallesiʼnde sâkin Mehmed Ağa b. el-Hâc İbrahim meclis-i ma‘kūd-ı mezkûrda müteveffâ-i mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olmağla tereke-i müteveffâ-i mezbûra bi’l-verâse vâzıʻatü’l-yed olan Zeyneb Hatun bt. Mehmed mahzarında üzerine da‘vâ ve takrîr-i kelâm edip müteveffâ-i mezbûr el-Hâc Mustafa Ağa b. Osman b. Abdullah zimmetinde cihet-i karz-ı şer‘îden yüz yirmi iki guruş hakkım olup hatta müteveffâ-i mezbûr fevtinden yirmi gün mukaddem meblağ-ı mezbûr cihet-i merkūmeden bana vâcibü’l-edâ deyni olduğunu huzûr-ı Müslimîn’de ikrâr ve işhâd edip ve kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahmiye-i mezbûrede Kul Câmi‘i Mahallesiʼnde sâkin Mehmed Odabaşı b. Ömer ve Ebûbekir Ağa b. Süleyman nâm kimesneler li-ecli’ş-şehâde meclis-i ma‘kūd-ı mezkûr[a] hâzırân olup isre’l-istişhâd fi’l-hakīka müteveffâ-i mezbûr el-Hâc Mustafa b. Osman b. Abdullah zimmetinde işbu müdde‘î-i mezbûr Mehmed Ağa’nın yüz yirmi iki guruş hakkı olup hatta müteveffâ-i mezbûr fevtinden yirmi gün mukaddem meblağ-ı mezbûr cihet-i karz-ı şer‘îden işbu müdde‘î-i mezbûra zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan Çukadâr Ahmed Ağa b. Mehmed ve Muhzır es-Seyyid Ahmed b. Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-şehri Rebîʻülâhir sene tisʻa ve hamsîn ve mi’e ve elf. Şuhûdü’l-hâl: el-Hâc Mehmed Efendi [b.] Mustafa, Mehmed Efendi [b.] Osman, Mehmed Ağa [b.] İbrahim, Mustafa [b.] Mehmed, Halil b. İbrahim.