Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 380 Hüküm no: 323 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa buzcubaşı Ali Ağa’nın vefât eden Karcıbaşızâde el-Hâc Mustafa Ağa’daki alacağını terekesinden talebi Hâlâ Ser-buzcuyân-ı hâssa olan işbu râfiʻü’l-kitâb Ali Ağa b. Ahmed meclis-i şer‘-i şerîf-i enverde medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Karcıbaşızâde el-Hâc Mustafa Ağa b. Osman’ın sulbî sagīr oğlu Mehmed Emin ile sagīre kızı Hadice’nin tesviye-i emirlerine bâ-hüccet-i şer‘iyye vasiyy-i muhtârları olup tereke-i müteveffâ-i mezbûra bi’l-vesâye vâzıʻu’l-yed olan Mehmed Ağa b. Hacı İbrahim Efendi mahzarında üzerine da‘vâ ve takrîr-i kelâm edip işbu yedimde olan deyn temessüğü nâtık olduğu üzere müteveffâ-i mezbûr Hacı Mustafa Ağa b. Osman b. Abdullah zimmetinde cihet-i deyn-i şer‘îden yüz guruş hakkım olup hatta müteveffâ-i mezbûr hâl-i hayâtında fevtinden üç ay mukaddem meblağ-ı mezbûr zimmetinde vâcibü’l-edâ deyni olduğunu huzûr-ı Müslimîn’de ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’[s-suâl ve’]l-inkâr müdde‘î-i mezbûr Ali Ağa’dan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûrede sâkinlerinden Hasan Ağa b. Abdullah ve Abdullah Çelebi b. Hüseyin nâm kimesneler li-ecli’ş-şehâde meclis-i ma‘kūd-ı mezkûra [85a] hâzırân olup isre’l-istişhâd fi’l-hakīka müteveffâ-i mezbûr el-Hâc Mustafa Ağa b. Osman b. Abdullah zimmetinde işbu müdde‘î-i mezbûr Ali Ağa’nın yedinde olan deyn temessüğü nâtık olduğu üzere cihet-i deyn-i şer‘îden yüz guruş hakkı olup hatta müteveffâ-i mezbûr el-Hâc Mustafa Ağa fevtinden üç ay mukaddem meblağ-ı mezbûr müdde‘î-i mezbûr Ali Ağa’ya deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm mâ-vaka‘a bi’t-taleb ketb olundu. Fi’l-yevmi’s-sâmin min-Cemâziyelevvel li-sene tisʻa ve hamsîn ve mi’e ve elf. Şuhûdü’l-hâl: Eş-Şâhidûnü’s-sâbıkūn.