Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 380 Hüküm no: 324 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin, vefât eden hanımından F doğan Râbia’nın kızı olduğunu ispatlaması Husûs-ı âti’l-beyânın mahallinde ketb u tahrîri için bu fakīr medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Servi Mahallesiʼnde sâkine iken bundan akdem vefât eden Fâtıma Hanım bt. Mustafa Bey’in hayâtında sâkine olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffât-ı mezbûrenin zevc-i metrûku işbu râfiʻü’l-kitâb Mustafa Çelebi b. Hasan nâm kimesne meclis-i ma‘kūd-ı mezkûrda medîne-i mezbûre mütevellîsi tarafından vekîli es-Seyyid Ahmed Ağa b. es-Seyyid Mehmed hâzır olduğu hâlde zevcem müteveffât-ı mezbûreden mütevellide benim firâşımdan hâsıla işbu sagīre kızım Râbia’ya vâlidesi müteveffât-ı mezbûreden müntakil sagīre-i mezbûrenin vakf-ı akārlarını ehl-i aʻrâzdan kimesnelerin iğvâsıyla evkāf mütevellîleri mahlûlüdür deyü sagīre-i mezbûreye intikāl eden akārlarını hilâf-ı inhâ müzâyede ettirmeleriyle hakīkat-i hâl suâl olunsun dedikde mezbûr Mustafa’nın takrîr-i meşrûh üzere suâl olundukda medîne-i mezbûrede Câmi‘-i Kebîr’de İmâm-ı Evvel Hatîb el-Hâc Mehmed Efendi b. Mustafa Efendi ve İmâm-ı Sânî Abdullah Efendi b. Mehmed Efendi ve Bostanî İbrahim Ağa b. Muslı ve Ali Çelebi b. Abdullah ve Mehmed Çelebi b. Ali ve es-Seyyid Mustafa b. Mehmed Emin ve es-Seyyid Hasan b. es-Seyyid Mustafa ve el-Hâc Mehmed b. Ahmed ve Mehmed Ârif Ağa b. Mehmed ve Mustafa b. Hüseyin Odabaşı ve Mustafa Ağa b. Mehmed ve Ebûbekir Efendi b. Mehmed Efendi ve Osman Ağa b. Ramazan ve el-Hâc Ali b. Mehmed ve nisvândan Kābile Fâtıma Hatun bt. Mustafa ve Hadice Hatun bt. Abdullah ve Âişe Hatun bt. Abdullah ve diğer Âişe Hatun bt. Salih ve İsmihan Hatun bt. Mehmed ve diğer Âişe Hatun bt. Abdullah ve Emine Hatun bt. Musa li-ecli’l-ihbâr meclis-i ma‘kūd-ı mezkûrda işbu sagīre-i mezbûre Râbia mezbûre Mustafa’nın firâşından hâsıla sulbiye kızı ve zevcesi müteveffât-ı mezbûreden mütevellide sadriye kızıdır, vâlidesi müteveffât-ı mezbûreden mütevellide olduğu hînde tehniye dahi etmişlerdir deyü herbiri alâ-tarîkı’ş-şehâde haber verdiklerinden sonra müteveffât-ı mezbûrenin li-ebeveyn kız karındaşı hâzır bi’l-meclis Hadice Hanım dahi vech-i muharrer üzere olduğunu mukır ve muʻterife olmağın hıfzan li’l-makāl mâ-vaka‘a bi’t-taleb ketb olundu. Fi’l-yevmi’s-sâbiʻ aşer min-Rebîʻülâhir sene tisʻa ve hamsîn ve mi’e ve elf, 1159. Şuhûdü’l-hâl: Abdülbaki Çavuş [b.] Ahmed Efendi, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Halil [b.] İbrahim, Ahmed Ağa [b.] Hamdi Mehmed, Mustafa Efendi [b.] Hüseyin, Ali Efendi, Halil Efendi el-Mukayyid.