Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 150 Hüküm no: 133 Orijinal metin no: [15a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Tagar’ın kendisine cinsel istismar teşebbüsünde bulunulduğuna dair iddiası Maʻrûz; Medîne-i Eyüb’de Çömlekciler sûkunda bakkal olan Tagar v. Agro? nâm şâbb-ı emred meclis-i şerʻde Balçık iskelesi kurbünde Na‘lband Hüseyin b. Ali ve Şâkird Ahmed nâm kimesneler muvâcehelerinde iki gün mukaddem baʻde’l-mağrib mezbûrân Hüseyin ve Ahmed ve refîkleri gāʼibûn ani’l-meclis Mustafa ve Hasan ve Feyzullah maʻan beni ahz, uçkurum çözüp donumu paralayıp bana fiʻl-i şenîʻ kasd etmişler idi deyü eylediği daʻvâsını isbâtdan izhâr-ı acz edip talebiyle mezbûrân Hüseyin ve Ahmed tahlîf olunduklarından sonra mezbûrân Hüseyin ve Ahmed’in nefslerine ve hîn-i mütâlebede huzûr-ı hükkâma ihzâra na‘lband ustalarından Hüseyin b. Hasan nâm kimesne kefîl olup ve gāʼibûn-ı mezbûrûn dahi ihzâr-ı şerʻ ve tahlîf olunmak üzere medîne-i Eyüb mahkemesinde tescîl olunduğu mübâşirleri Mumcu Halil kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sânî min-Rebîʻi’l-âhir li-sene sittin ve miʼe ve elf.