Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 153 Hüküm no: 140 Orijinal metin no: [15b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haslar ve tevâbii mukataası kalemlerinden Yoros kaleminin serbestiyet üzere gelirlerini toplamakla görevli olan şahsa müdâhale edilmemesi Vech-i tahrî-i hurûf budur ki; Cennet-mekân Firdevs-âşiyân merhûm ve mağfûrun-leh Sultan Bâyezid-i velî −tâbe serâhu− hazretlerinin İstanbul’da vâkiʻ câmiʻ-i şerîfi ve imâret-i âmireleri evkāfından Haslar ve tevâbiʻi mukātaʻâsı aklâmından Yoros kalemi ve tevâbiʻihâ kurâları işbu bin yüz altmış senesi Martı ibtidâsından Şubat’ı gāyetine değin zabt eylemek üzere işbu hâfizü’t-temessük kıdvetü’l-emâsil ve’l-akrân ( ) −zîde kadruhu− tâlib ve râgıb olup bin üç yüz otuz guruşa iltizâmen deruhde ve kabûl ve meblâğ-ı mezbûru ber-vech-i peşin şerʻan vakf-ı şerîfe edâ ve teslîm ve umûr-ı vakfa sarfla istihlâke izin verip vakfın ve bizim zimmetlerimizi ibrâ ve iskāt etmekle zabt u rabta izin verildi. Bi-avnillâhi teʻâlâ zamânı hulûlünde karye-i mezbûrenin hâsılları vaktinde vâkiʻ olan mahsûlâtından hâsıl olan âʻşâr-ı şerʻiyyesin ve rüsûm-ı örfiyesin ve yâve ve kaçgun kul ve câriye müjdegânesin ve mâl-ı gāʼib ve mâl-ı mevkūf ve beytülmâl-i âmme ve hâssa ve rüsûm-ı arûsâne ve resm-i bennâk ve öşr-i kovan ve mukātaʻât-ı bâğât ve çayır ve kefere reʻâyâlarının ispençelerin ve sâir cüzʼî ve küllî rüsûmât ve hukūkātın sinîn-i sâbıkālarda olageldiği vech üzere zabt u rabt edip ve dahi evkāf-ı selâtîn mefrûzu’l-kalem ve maktûʻu’l-kadem min-külli’l-vücûh serbest olmağla umûr-ı serbestiyete âhardan hiç kimesne mâniʻ ve dâfiʻ ve müzâhim olmamak içün işbu hurûf li-ecli’t-temessük ketb ü tahrîr ve yedine vazʻ olundu. Tahrîren fi’t-târîhi’l-mezbûr. Hasan b. Mustafa Emîn-i Haslar hâlâ