Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 153 Hüküm no: 141 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çekmece-i sagir nâhiyesine tâbi Safra karyesi reâyâsının Demirkapı çiftliği suyollarının tamir ve bakımı karşılığında cizyeden başka vergi talebiyle rencide olunmamaları Fermân derkenârıdır. Haslar kadısına hüküm ki; ( ) nâhiye-i mezbûra tâbiʻ Safra karyesi ahâlîleri Dîvân-ı hümâyûna arzuhâl edip Üsküdar’da medfûn Atik Vâlide Sultan Evkāfı’ndan Demirkapı Çiftliği hizmetine meʼmûr olup çiftlik-i mezbûrun lâzım gelen hizmeti mukābili cizyeden mâʻadâ tekâlifden muʻâf olup âhardan bir ferd taʻaddî olunmak iktizâ eylemediği yedlerine iʻtâ olunan fermân-ı şerîfle tasrîh olunmuş iken bostâniyân hasekileri ve karye ustaları ve karye subaşısı ve hamr emîni ve sâir ehl-i örf tâifeleri baʻzı teklîfler ile rencîdeden hâlî olmayıp gadretmeleriyle yedlerinde olan fermân-ı âlî mûcebince merkūmânın taʻaddîleri üzerlerinden menʻ ü defʻ olunmak bâbında emr-i şerîf verilmek ricâsına istidʻâ-yı inâyet eyledikleri ecilden hazîne-i âmiremde mahfûz olan mevkūfât defterlerine nazar olundukda Haslar kazâsına tâbiʻ Çekmece-i sagīr nâhiyesinde Safra karyesinin yirmi üç nefer zimmîyân üzerlerine beş buçuk ve bir rubʻ avârızhânesi olup hîn-i tahrîrde köprü ve çayır ve hendek hizmetleri mukābelesinde muʻâf olup otuz altı senesinde muʻâfiyetleri refʻ ve hâneye olunmuş iken ba‘dehû otuz yedi senesinde karye-i mezbûr ahâlîleri Demirkapı Çiftliği’nin suyolunu beher sene taʻmîr ve termîm ve zabt u rabtları çiftlik-i mezbûr mutasarrıfı yedinde hâne-i avârız ve tekâlif-i sâireden muʻâfiyetleri kemâ-fi’l-evvel ibkā ve bundan böyle umûr-ı şerʻiyyeleri dahi Haslar mahkemesinde görülmek üzere emr-i şerîf verdiği derkenâr olunup imdi muʻâf ve gayr-ı muʻâf tekâlifden mâʻadâ muʻâfiyetlerine mugāyir taʻaddî etdirilmeye deyü bin yüz kırk dört senesi Şevvâli’nin on yedinci günü emr-i şerîf verildiği mukayyed olmağın imdi derkenârı mûcebince hükm deyü fermân-ı âlî sâdır olmağın emr-i şerîf verilmişdir. Fermân devletlü inâyetlü Sultanımındır. Fî 4 Ramazan sene [1]160 Sah unvânıyla muʻanvendir. Derkenârı mûcebince hüküm. Devletlü merhametlü Sultanım hazretleri sağ olsun. Bu reʻâyâ kulları Haslar kazâsı muzâfâtından Safra nâm karye fukarâsı kulları olup yedimizde olan iki kıtʻa fermân-ı âlîşân mûcebince avârızhânemizden ve tekâlif-i sâiremizden muʻâf ve muʻâfiyetimiz mukābili emlâk-i hümâyûndan Demirkapı Çiftliği suyolları taʻmîrine meʼmûr ve hîn-i meʼmûriyetimizden bu âna değin hizmet-i lâzimemiz kıyâmına meşgūl ve bir gûne müdâhale îcâb etmediğinden mâʻadâ seferler olmamak takrîbiyle kazâmız mesârifi kalîl iken Haslar ve Çekmece-i sagīr ahâlîleri mahzâ tamaʻ-ı hâmlarından nâşî mesârif-i kesîreyi hâvî kendi kavl-i hodları ile bir defter peydâ ve her karyenin hisselerine göre birer mikdâr şey tarh ve muʻâfiyetimiz üzere bizlerden iktizâ etmez iken bu fakir reʻâyâlarına dahi bir mikdâr şeyi tarh edip tahsildâra defterin teslîm ve her bâr gelip tağrîm ve tecrîm ile taʻaddîden hâlî olmayıp hem suyolları taʻmîrine sarf-ı kudret ve hem bu gûne masraf çekdikde gadr ve zulm olacağı âşikâr ve Devlet-i aliyye civârında bulunup bu gûne taʻaddîye rızâ-i âlîleri olmayacağı be-dîdâr olmağla merâhim-i âlem-şümûllerinden mesʼûl-i âcizânemiz budur ki; yedimizde olup derkenâr etdiğimiz fermân-ı âlîşân manzûr-ı devletleri buyruldukda hâlimize merhameten Çekmece-i sagīr ahâlîlerinin bî-vech taʻaddîleri menʻ ü defʻ etdirmek içün derkenârımız mûcebince amel ve hilâfından hazer oluna deyü yedimize müʼekked fermân-ı âlîşân buyurmaları bâbında emr u fermân devletlü merhametlü Sultanım hazretlerinindir. Bendegân-ı reʻâyâ-yı Safra