Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 157 Hüküm no: 147 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın kefâletinden dolayı Nalband İsmail Beşe’ye olan borcunu ödemesi Maʻrûz; İşbu bâʻisü’l-iʻlâm Na‘lband İsmail Beşe nâm kimesne Eyüb’de vâkiʻ kolluk bayrakdârı mübâşeretiyle ihzâr olunan Mustafa nâm kimesne ile terâfuʻlarında bundan akdem mezbûr Mustafa gāib ani’l-meclis Hüseyin nâm kimesneler zimmetlerinde iştirâ ve kabz etdikleri maʻlûmü’l-kıyye saman bahâsından on beş guruş ve öküz bahâsından on yedi guruş cemʻan otuz iki guruş hakkım olup ve meblâğ-ı mezbûrdan âharın zimmetine lâzım gelen meblâğa kefîl ve dâmin olmalarıyla meblâğ-ı mecmûʻ-ı mezbûr otuz iki guruşu asâleten ve kefâletine binâʼen mezbûr Mustafa’dan taleb ederim deyü daʻvâ etdikde mezbûr Mustafa ber-vech-i muharrer semen-i mebîʻden olan meblâğ-ı deyn-i mezbûru ve kefâletini ikrâr ve iʻtirâf etmeğin meblâğ-ı mecmûʻ-ı mezbûr otuz iki guruşu müddeʻî-i mezbûr Na‘lband İsmail’e edâ ve teslîm etmek üzere ikrârına binâʼen mezbûr Mustafa’ya tenbîh-i şerʻî-birle Eyüb mahkemesinde tescîl olunduğu huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâlis aşer min-şehri Rebîʻi’l-âhir sene sittin ve miʼe ve elf.