Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 158 Hüküm no: 148 Orijinal metin no: [16b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cebeci karyesinden Mariyora’nın Müslüman olup Ayşe ismini aldığı Maʻrûz-ı dâʻî-i Devlet-i aliyyeleridir ki; Saray-ı Âsafî’de çavuşbaşı ağalara mahsûs olan odada maʻkūd meclis-i şerʻ-i hatîrde Attâr Halil b. Receb ve Avanes v. Haçador nâm kimesneler Haslar kazâsı tevâbiʻinden olan Cebeci karyesi sâkinelerinden olup İslâmını münkire olan Mariyora bt. Cudar nâm Nasrâniye muvâcehesinde bin yüz altmış senesi Saferi’l-hayrın on beşinci günü karye-i mezbûrede vâkiʻ çeşme önünde işbu mesfûre Mariyora kelimeteyn-i şahâdeteyn tekellüm ve Müslüman oldum deyü huzûrumuzda ikrâr etmiş iken birkaç gün içinde irtidâdı maʻlûmumuz olmuşdur deyü alâ-tarîkı’l-hasbiyede her biri şehâdet edip lede’t-tezkiye şehâdetleri makbûle olmağın mûcebince mezbûre Mariyora’nın İslâmına hükmolundukdan sonra Eyüb mahkemesinde tekrar İslâm arz [17a] olundukda mezbûre Mariyora İslâmı kabûl etmekle ismi Âişe tesmiye olunup rızâsıyla bir küfüv hâtıbına tezvîc içün karye-i mezbûre zâbiti olan su nâzırı ağa hareminde tevkīf olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 10 Rebîʻülâhir sene 1160