Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 159 Hüküm no: 153 Orijinal metin no: [17a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aya Yorgi karyesinden Yorgi’ye iftira ederek menzil ve han ortaklığından çıkaran Meymunoğlu Yanaki’nin men edilerek menzilinin mühürlenmesi Maʻrûz; Haslar kazâsında Aya Yorgi karyesinden ihtiyâr Yorgi nâm zimmî nısflarına bâ-hüccet şirâʼen mâlik olduğu karye-i mezbûrede vâkiʻ bakkal dükkânı ve hânın kezâlik nısflarına mâlik şerîki Meymunoğlu Yanaki karye-i [mezbûre] ahâlîsinden birkaç kimesne ile yek-dil ve karyede istemeziz durmamağa taʻahhüdü nâtık iʻlâm aldık deyü benim ve oğlum Angeli üzerlerimize nesne sâbit olmadan menzilimizden ihrâc ve dükkân [ve] hândan mülküm olan hissemi fuzûlî müstakillen zabt etmişlerdir deyü tazallüm etmekle mahallinde murâfaʻa ve icrâ-yı hakk olunması içün dâʻîlerine hitâben ısdâr eylediği tuğra-yı emr-i âlişâna imtisâlen savb-ı şerʻden irsâl olunan Başkâtib Mehmed Efendi karye-i mezbûreye varıp akd-i meclis-i şerʻ-i hatîr eyledikde husemâsından Meymunoğlu Yanaki görünmeyip ve mesfûrân haklarında iştikâ eden ahâlî-i karyeden sûret-i iʻlâmda mesfûr Dimitri ve Yanaki ve Tarancun ve Ustoyko ve Ergiri ve Aneşini, altı nefer zimmîler haklarında olan iştikâlarımız mesfûr Meymunoğlu Yanaki tahrîkiyle idi bizler katʻan zarâr görmedik deyü külliyen rücûʻ ve katʻ-ı nizâʻ edip ve ahâlî-i karyeden dokuz nefer ve civâr on aded karyelerden müseccelü’l-esâmî on sekiz nefer bî-garaz kimesneler dahi bu âna değin mesfûrândan zarâr ve ziyân görmeyip kendi hâllerinde biliriz deyü haber verdikleri ve mevlânâ-yı mezbûr iki gün dahi karyede meks edip husemâsından dükkân ve hânı müstakillen zabt eden Meymunoğlu Yanaki adem-i itâʻatine binâʼen [17b] murâfaʻaya gelmeyip menzilinde ihtifâ eylediğini karye ahâlîsi haber verdiklerini mevlânâ-yı mezbûr vâkiʻ hâli baʻde’t-tahrîr ve’l-inhâ zikr olunan dükkân ve hânı müstakillen zabt eden hasmı Meymunoğlu Yanaki’nin menzili temhîr olunmak bâbında bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’r-râbiʻ aşer min-şehri Rebîʻi’l-âhir sene sittin ve miʼe ve elf.